Bjarni og Fjölskylda

Skautafjör :)

2012-02-08T16:58:00.003Z

Undanfarið hefur verið ótrúlega kalt hjá okkur í Dönsku sveitinni eða allt upp í mínus 22 gráður á nóttunni. Bíllinn okkar þoldi ekki álagið og það gaf sig vatnshosa á laugardaginn þrátt fyrir að passað hafi verið upp á frostlög og tilheyrandi en væntanlega var um veikleika að ræða sem gaf sig við álagið. Að fara undir sæng á kvöldin er alveg magnað þar sem öll kynding er í lágmarki og því hressilega kalt að skríða undir sæng en það lagast fljótt enda fólkið á bænum komið í æfingu eftir frostaveturinn mikla í fyrravetur :) Hér stefnir þó í rauðar tölur á næstu dögum og vonandi er bara að koma vor hjá okkur. Lína Rut nýtir tækifærið og skautar í sveitinni og í dag skrapp hún með vinkonu sinni á næsta bæ á skautasvell hérna rétt hjá. Allir voru vel klæddir, Lína Rut í lopapeysu og flísbuxum og auðvitað var heitt kakó með í för. Náði mynd af litlu stelpunni okkar þegar hún kom heim, fallega rjóð í kinnum og ánægð með daginn :)
Kv, Bjarni Kr

Unglingurinn okkar

2012-01-22T13:38:00.002Z

Ævar Elí fer hröðum skrefum í átt að unglingnum þessar vikurnar eða mánuði og má sjá og heyra á honum að hann er að verða stór :) Hann er farinn að vilja greiða sér oftar þegar verið er að fara eitthvað og setja á sig ilm og svoleiðis fínerí. Umræðu efnið er að einnig að breytast og nú er hann farinn að taka meiri þátt í umræðuefnum fullorðna fólksins. Sem betur fer er litli drengurinn okkar að þroskast þó það taki aðeins á foreldrana, sem telja sig enn vera korn ung og að þau eigi enn lítil börn. Lífsins gangur og hvert tímabil fyrir sig með sinn sjarma og nú er bara að njóta þess að horfa á drenginn stækka og þroskast og taka þátt í þeirri ferð með honum :) Set hérna mynd af unglingnum á leið í "Lan partý" á næsta bæ sem stóð yfir alla nóttina eins og unglingum er von og vísa og fór Ævar Elí hlaðinn birgðum af snakki og gosi. Algerlega sætasti strákurinn okkar :)
Kv, Bjarni Kr

Uppeldið að skila sér

2012-01-22T13:00:00.000Z

Litlu stubbarnir okkar hafa ekki verið hrifin af grænmeti hingað til eins og reyndar mjög mörg börn, en í seinni tíð hefur Ólöf María reynt að koma því meira að og einnig hjá bóndanum á bænum. Nú er svo komið að bóndinn velur oft að útbúa salat og einnig hefur frúin náð mjög góðum árangri hvað varðar litlu ungana. Það er oftar en ekki ef salat er á borðstólnum að þau taka verulega vel til matar síns. Ólöf María á allan heiður af þessum þætti uppeldisins á heimilisfólkinu og er vægast sagt frábært að sjá árangurinn enda mjög mikilvægt hollustu atriði til lengri tíma litið og gott veganesti fyrir börnin út í lífið. Pabbinn og Lína Rut þurfa samt smá grillaðan kjúkling með svo það dugi sem máltíð og virðast matarvenjur okkar vera mjög líkar á meðan Ólöf María og Ævar Elí geta borðað bara grænmeti enda eru þeirra venjur algerlega eins, svona virðist þetta skiptast eftir genum :) Set hérna mynd af Línu Rut að raða á diskinn sinn en útlitið á disknum skiptir ekki síður máli :)

Kv, Bjarni Kr

Nýjasti rakarinn :)

2012-01-16T10:26:00.000Z

Svo virðist sem sumt sé einfaldlega genatískt, þar sem litla stelpan okkar rauk í það að útbúa rakarastofu fyrir Barbie um daginn. Hún var ekkert að tvínóna við hlutina heldur skellti bara upp stofu og snyrti allar dúkkurnar sínar og fór það bara vel úr hendi. Hér var eins og um meðfædda hæfileika væri að ræða enda komin af rakarafjölskyldu í annan legginn. Hún er svakalega dugleg þessa dagana að leika sér í Barbie og er nánast búin að eigna sér sjónvarpsherbergið enda segist hún hvort eð er nota það mest :) Yndisleg þessi litla stelpa okkar og svo framtakssöm og dugleg. Set hérna mynd af henni í óðaönn við að klippa Barbie strákinn sinn :)
Kv, Bjarni Kr

Gleðilegt nýtt ár 2012

2011-12-31T15:47:00.001Z

Áramótapistillinn í ár einkennist eða mótast þónokkuð af þeirri staðreynd að bóndinn á bænum er á leið í starfsviðtal til Noregs á nýju ári sem óvíst er hvað ber í för með sér. Þann 4 janúar eða aðeins eftir 5 daga munu plön ársins liggja fyrir annað hvort plan A eða plan B en þau eru bæði klár. Það er með ólíkindum að skólinn minn sé að verða búinn og þessu margt merkilega 2ja ára umbreytingar plani okkar senn að ljúka og þegar maður lítur yfir farinn veg er þetta búið að vera stórkostlegt í einu orði sagt. Þar sem ég er mikið fyrir að setja mér markmið allan ársins hring nýt ég þess enn frekar að setja mér markmið um áramót og fyllist alltaf eldmóð í janúar og febrúar þar sem nýtt ár er að hefjast og nýjir tímar framundan. Fjölskyldan er í virkilega góðu jafnvægi eftir dvölina í Danmörku, allir orðnir öruggir á sínu umhverfi og verkefnum, allir farnir að tala nýtt tungumál og eiga nýja vini og þrár. Lína Rut hefur tekið tungumálið einna föstustu tökunum og talar algjörlega eins og innfædd, hún hefur haldið titlinum skemmtilegasta og duglegasta stelpan í bekknum enda hleypur hún hraðast, syngur best, er fimust og flinkust á öllum sviðum og allra manna hugljúfi. Ævar Elí hefur farið hægar í þetta en meitlað sig inn í hug og hjörtu samnemenda og kennara á seiglunni og rólegu nótunum, hann er virkilega góður í dönskunni en flaggar því ekki eins mikið og systir sín en kemur á óvart þegar hann þarf að nota tungumálið. Ólöf María hefur notað tungumálið meira í formi sms skilaboða til að staðfesta ýmsa barna hittinga og þessháttar við mömmurnar í bekknum og er hún orðin algerlega fullskrifandi og í raun talandi þó hún flaggi því minnst af okkur öllum enda hógvær að eðlisfari. Pabbinn hefur þurft að nota dönskuna og er bæði vel talandi og skrifandi en svo hefur það verið enskan í skólanum enda í "international" bekk eða með öðrum orðum þá erum við öll með´etta :) Framtíðin er örlítið óráðin enn, eins og sagði í byrjun, þar sem skólinn er senn á enda í vor og ekki fullmótað hvort við förum í plan A eða B en við erum þó allavega með 2 plön tilbúin. Noregsferðin þann fjórða snýst um atvinnumál og það er það sem skiptir okkur mestu máli að fá atvinnu að námi loknu, hinsvegar er undirritaður kominn með inngöngu í MBA nám að loknu núverandi námi og togar það verulega enda fer það meira inn á business og marketing áhugasviðið sem er mér svo kært. Við fjölskyldan erum þakklát fyrir að hafa fengið tækifæri til að prófa að búa á erlendri grund og undirritaður er verulega þakklátur fyrir þær fórnir sem fjölskyldan og frú María hafa fært svo skólagangan gæti orðið að veruleika, þetta er eitthvað sem þarf mikinn kjark til að framkvæma á okkar aldri með 2 börn. Án konunnar minnar hefði ég ekki getað þetta né án stuðnings frá nánum ættingjum og vinum og fyrir það er ég mjög þakklátur. Vinátta og góðmennska hefur í raun öðlast nýja merkingu hjá mér þrátt fyrir að ég hafi ávalt verið góður við menn og dýr þá hef ég ekki notið þess á þann hátt sem ég hef gert í fjarbúðinni hérna í DK. Þrátt fyrir allt hefur þetta þjappað litlu fjölskyldunni minni saman og teljum við okkur vera ósigrandi eftir að hafa farið í gegnum þessa reynslu saman og eiga börnin og frúin mín skilið orðu fyrir dugnað, elju, stuðning og skilning á því að pabbin sé í námi. Það er því með smá trega í röddu að við hugsum til þess að þurfa kanski að kveðja Danmörk á einhverjum tímapunkti enda gætum við hugsað okkur að setjast hér að til lengri tíma litið. Danmörk hefur farið vel með okkur, við kunnum að meta sveitalífið, fólkið hérna í kring hefur verið bæði hjálplegt og vingjarnlegt auk þess sem veðurfarið á mjög vel við okkur öll. Árið 2012 stefnir í að verða breytingar ár fyrir okkur og það stefnir í ný ævintýri og nýjar áskoranir sem við teljum okkur virkilega vel í stakk búin að mætast á nýju ári, við erum þakklat fyrir það sem við höfum og virkilega spennt fyrir því sem framundan er. Kveðjan frá okkur að þessu sinni hljómar því einhvernveginn svona :)

Gleðilegt nýtt ár og kærar þakkir fyrir það liðna, horfum fram á veginn og njótum hverrar stundar að fullnustu enda kemur hún ekki aftur. Hugsið vel til þeirra sem minna mega sín, hlúið hvort að öðru og látið góðmenskuna verða ykkar leiðarljós í framtíðinni, því sú neikvæðni sem einkenndi landið okkar fallega þegar við fluttum er ekki neinum til góðs. Leitist við að sjá aðeins það jákvæða í fari fólksins og þið munið uppskera sem þið sáið. Við sendum öllum ættingjum og vinum sterka strauma héðan frá okkur í Danmörku og hlökkum til að sjá sem flesta á nýju ári.

Að fara í skóla á erlendri grund,
og flytja til Danmerkur með lítinn hund.
Var bæði stór og merkileg stund.
og einungis hægt, léttur í lund.

Við ákváðum strax að standa öll saman,
fjölskyldan ávallt brosand´í framan.
Í hverri og einustu raun sem við sjáum,
samtaka tökum og sigur við fáum.

Kv, Bjarni Kr

Yndisleg sms skilaboð :)

2011-12-28T09:02:00.003Z

Lína Rut okkar fékk loksins gsm síma en það hefur verið í umræðuni frá því við fluttum út til DK. Nú létu foreldrarnir verða að því af hluta til af öryggis ástæðum en ekki síður af þrýstingi :) Þeir sem sáu jólamyndirnar á facebook hjá mér muna væntanlega eftir svipnum þegar hún opnaði pakkann en það var ótrúlega skemmtilegt "móment" en nú bætast við enn skemmtilegri hlutir því litla stúbban okkar er farin að senda sms til foreldranna og set ég hérna nokkur inn til gamans :) "Dad er bara1 bateri" - "Ringdu i mig bara firir gani" - "Hæ pabbi dad er gedveIGT" - "Pabbi mer langar ekki i brod mer langar bara i kako" og svona mætti lengi telja :) Pabbinn vissi að þetta yrði á þennan veginn og samdi því um frítt sms á milli fjölskyldunnar við símafyrirtækið okkar og nú sér maður að það var mjög gáfulegur samningur. Yndislegt að taka þátt í þessu með litlu stelpunni okkar sem er svo skemmtilega blátt áfram í öllu sem hún gerir. Set hérna mynd frá aðfangadagskveldi þegar hún var komin í jafnvægi eftir að hafa opnað pakkann með símanum í :)
Kv, Bjarni Kr

Gleðileg jól

2011-12-24T09:39:00.000Z

Aðfangadagur 2011 er runninn upp og viti menn, Lína Rut sefur enn og klukkan orðin 10:30 þegar þetta er ritað. Pabbinn spratt á fætur fyrstur en þó ekki af pakka spenningi heldur var hann að kljást við stórt verkefni í draumi sem tengist lokaverkefninu á fjórðu önn, já þetta er Bjarni í hnotskurn. Þegar ég sef þá vinnur hugurinn sem aldrei fyrr og flestar af mínum uppgötvunum og ákvörðunum eiga sér stað um nætur :) Framundan er skemmtilegur dagur, fullur af gleði og gjafmildi og ekkert vildum við fjölskyldan frekar en að vera innan um okkar ástkæru fjölskyldu og vini heima á Íslandi en þess í stað njótum við þess að vera bara við. Þessi einvera ef svo mætti kalla hefur þjappað okkur öllum saman, og við höfum notið hennar verulega þó við gætum ekki hugsað okkur þetta um ókomna tíð. Framundan er ár breytinga að öðru sinni hjá okkur á stuttum tíma þar sem 2ja ára planið okkar er senn á enda. Atvinnu viðtal í Noregi þann 4 janúar gæti haft veruleg áhrif á framtíðarplönin en við sjáum bara til á nýju ári.

"Gleðileg jól allir ættingjar og vinir, nær og fjær og njótið þess að vera saman og eiga gleðileg jól. Litla fjölskyldan í Grænuhlíð sendir sínar allra bestu jólakveðjur og góða strauma til allra. Þið eruð okkur efst í huga á jólum sem og aðra daga því án fjölskyldunnar væri lífið ekki eins. Passið uppá hvert annað, hlúið að þeim sem minna mega sín og njótið þess að vera til. Við höfum átt yndislegan tíma í Danmörku og fjarlægðin hefur minnt okkur rækilega á mikilvægi þess að standa saman og vera góð hvert við annað. Án ykkar hefðum við ekki getað klárað þetta verkefni og þökkum við af hlýhug allar þær gjafir sem þið hafið sent okkur og stuðninginn og hvatninguna sem þið hafið gefið okkur. Enn og aftur gleðileg jól til ykkar og gæfuríka framtíð til okkar allra.

Jólakveðja, Bjarni Kr

Þorláksmessa

2011-12-23T09:13:00.002Z

Þorláksmessa er runnin upp og Lína Rut er að springa úr spenningi, hana langar svo að opna pakkana að Amerískum sið, þ.e. á náttfötunum um morguninn þann 25 en í morgun sagði hún að hún gæti bara ekki beðið einn dag enn ... litla krúttið okkar er alveg að fara á kostum þetta árið og þetta er hámarksspenningur sem við höfum séð hjá henni, en það er voðalega gaman að taka þátt í þessum spenningi með henni. Ævar Elí tekur þessu öllu með stóískri ró og hann breytist ekkert frekar en fyrri daginn þó það séu að koma jól, enda með óvenju mikið jafnaðargeð drengurinn okkar :) Við fórum frekar seint að sofa í gær en þrátt fyrir það kom litla stúbban hans pabba og kissti pabbann á vangann og sagði góðan daginn en það táknar auðvitað að pabbinn á að spretta á fætur "med det samme" og koma niður með Línu sinni að horfa á barnaefnið í sjónvarpinu. Jólin eru yndislegur tími og það eru forréttindi að fá að taka þátt í þessu með börnunum okkar. Jóla andinn hefur þó ekki komið til okkar eins mikið í ár, og líklegt er að skortur á heimsóknum til vina og vandamanna spili þar stóra rullu en auk þess eru rauð jól sem gerir þetta líka ekki eins jólalegt. Síðast en ekki síst varð allt jólaskrautið frá Frú Maríu eftir á Íslandi og því mjög lítið skreytt húsið en við vorum vön því að mamman skreytti í margar vikur fyrir jól :) Engu að síður koma jólin, allir hafa fengið pakka frá okkur og við frá vinum og ættingjum svo þetta verður allt eins og það á að vera. Búið er að kaupa hamborgarhrygg frá slátraranum í Herning og svo sendi mamma okkur hangikjét fyrir jóladag og pabbi fulla tösku af ýmsu góðgæti frá Íslandi svo þetta verður eins líkt Íslenskum jólum og við getum haft. Set hérna mynd af Línu Rut við að skreyta jólatréð í ár en eins og sjá má er létt yfir henni og hún er alltaf tilbúin þegar þarf að stilla sér upp :)
Kv, Bjarni Kr

Tengdapabbi á afmæli í dag

2011-12-20T09:33:00.002Z

Tengdapabbi minn á afmæli í dag og óskum við honum innilega til hamingju með daginn að vanda. Frú María var svo heppin að komast til Íslands í nóvember, í boði mömmu sinnar, því þá komst hún í heimsókn til pabba síns sem hún saknar svo mikið. Það er það skrýtna við búsetu erlendis að við hittum ekki vini og ættingja eins og var, því þeir sem þekkja okkur vita að í Tröllhólum voru ansi oft mannamót með tilheyrandi tertum og brauðréttum og þar fengum við útrás fyrir þá þörf að vera innan um fólkið okkar. Nú hefur þetta snúist við og hittum við varla nokkurn mann en það er ákveðinn sjarmi yfir því í smá tíma. Við erum með plön um að hitta fólkið okkar meira á næsta ári og vonandi höfum við tök á því að fá afmælisbarnið í heimsókn eða komast til hans á nýju ári. Innilega til hamingju með daginn þinn tengdapabbi og njóttu dagsins og augnabliksins, við sendum þér góða strauma héðan frá Danmörku og styrk. Kærar kveðjur, Bjarni Kr, Stúbba, Ævar Elí, Lína Rut, Zorro, Lennon og kisurnar.

Nú er svo komið að við lumum ekki á nýjum fjölskyldu myndum þar sem við höfum verið hér í DK í næstum 2 ár en þess í stað set ég inn mynd frá því tengdó varð 60 ára og þessi er tekin í Tröllhólunum :)
Kv, Bjarni Kr

Jólatréð komið á sinn stað

2011-12-19T21:51:00.000Z

Þá er búið að setja upp jólatré í Grænuhlíð með tilheyrandi fjöri. Lína Rut og Ævar Elí höfðu gaman af þessu öllu en þó má sjá dvínandi áhuga enda börnin okkar alltaf að stækka. Það þurfti að grína mjög mikið með jólaskrautið og skríkja og hlægja endalaust sem er jú smá partur af þessu öllu því spenningurinn lætur ekkert á sér kræla. Ef Lína Rut fengi að ráða væri búið að opna alla pakkana enda er hún ekki sú þolinmóðasta í fjölskyldunni :) Þessi gjörningur er alltaf skemmtilegur og breytist jafn hratt og börnin eldast en innst inni þykir þeim vænt um þessar hefðir og vitna oft í gamla tíma þegar hitt og þetta gerðist í Tröllhólunum. Skemmtilegir tímar framundan hjá fjölskyldunni á erlendri grund og von á gestum strax í næstu viku þegar tengdamamma og Jean koma til okkar og ætla að eyða með okkur áramótunum. Þegar kom að því að setja tréð í jólatrés fótinn passaði ekki leggurinn í fótinn og bóndinn á bænum dó ekki ráðalaus og tók fram réttu græjurnar til þess að snikka legginn til :)
Kv, Bjarni Kr

Leggurinn sniðinn :)

2011-12-19T21:50:00.000Z

Lína Rut sæta spæta :)

2011-12-19T21:40:00.000Z

Ævar Elí sæti sæti öðlingur :)

2011-12-19T21:30:00.000Z

Þá er litla stúbban mín farin að semja dans :)

2011-12-18T09:45:00.000Z

Það er með ólíkindum að fylgjast með þessum litlu krílum sínum þroskast og finna sinn stíl eða takt í lífinu. Ævar Elí er algerlega dottinn á kaf í tölvu áhugann á öllum sviðum, leikur auðvitað mest í tölvuleikjum en er einnig farinn að hafa áhuga á að skilja og læra á virknina. Hann er svo heppinn að þar hittir hann pabba sinn á réttri hillu og eru feðgarnir byrjaðir að bralla ýmislegt út fyrir tölvuleikina og drengurinn er alveg að skilja hvert einasta hugtak og farinn að geta gert rosalega mikið sjálfur. Svo teiknar og skrifar Lína Rut alla daga bæði skáldsögur og raunveruleikasögur ásamt því að myndskreyta allt í bak og fyrir. Þeir sem þekkja hana vita að hún syngur líka allan daginn og leikur þar sem það á við og nú var að bætast við danshönnun :) Í gær var hún ein inni í eldhúsi og tók sporin um allt með tilheyrandi endurtekningum á sama laginu, þegar betur var að gáð var verið að semja dans með tilheyrandi pósum og stökkum og það sem toppaði það var að hún skráði allar hreyfingar hjá sér. Svo virðist sem þessi litlu kríli okkar ætli að erfa aðeins það besta frá hvoru foreldri fyrir sig og átti Ólöf María ófá dans atriðin í gamla daga og pabbinn varð snemma tölvufær :) Því má samt ekki gleyma að pabbinn vann líka einu sinni danskeppni bæði í freestyle og samkvæmisdönsum svo það leynast gen víða ha ha en ég set hérna mynd af nýjasta dansinum hennar Línu Rutar :)
Kv, Bjarni Kr

Minnir á gamla daga :)

2011-12-17T11:48:00.002Z

Hún Lína Rut okkar er stöðugt að framleiða eitthvað hvort heldur er í skólanum eða heima. Hún kemur daglega heim með skáldsögur, myndskreyttar af sér og innbundnar eða plastaðar auk þess sem hún notar alla skókassa eða bara hvað sem er til að útbúa ímyndaða veröld fyrir dýrin sín. Nýjasta afurðin er Kók bíll sem var búinn til úr litlum kók kassa. Hún bannar foreldrunum að henda klósett rúllum og nú kom það að góðum notum sem dekk á bílinn og einnig bjó hún til sæti eða bekki í trukkinn fyrir öll dýrin sín. Set hérna myndir af herlegheitunum en eins og gefur að skilja er litla stúlkan okkar verulega stolt af því sem hún hefur búið til :) Hún leikur svo mikið með þetta þrátt fyrir að eiga alla heimsins barbie kastala og svo virðist sem sköpunargáfan eigi bara hug hennar allan þessa dagana.
Kv, Bjarni Kr

Hér er svo full rúta af Petshop dýrum :)

2011-12-17T11:40:00.000Z

Þriðju önn lokið

2011-12-17T11:08:00.000Z

Allt hefst þetta á endanum og er nú svo komið að 3 annir af 4 eru búnar af plönum okkar hérna í Danmörku. Það er algerlega ótrúlegt hversu hratt tíminn líður og finnst mér við eiginlega vera nýkomin hingað :) Fjórða önnin er praktík og verður í léttari kantinum fyrir mig enda með það mikla starfsreynslu og því þarf ekki að kenna mér að vakna í vinnuna eða vinna undir pressu :) Næstu skref eru því við það að mótast hjá okkur og standa 2 plön ofar öðrum þessa dagana en það er að vinna í Noregi og/eða fara í MBA nám í Kolding. Bóndinn á bænum stefnir á starfsviðtal í Noregi þann 20 des og að því loknu verður púlsinn tekinn um framhaldið. Lokaprófið á þriðju önn fór vel og endaði ég með einkunnina 10 en ég tók fyrir verulega krefjandi verkefni og langt umfram það sem aðrir voru að gera í bekknum enda vanur að vilja ekki fara meðalveginn heldur láta reyna verulega á getuna auk þess sem um frumkvöðla hugmynd var að ræða sem gerði þetta enn meira krefjandi :) Lokaprófið endaði með smá stressi enda frétti ég það 14 tímum fyrir próf að ég þyrfti líklega að flytja vörnina einn þar sem félagi minn missti af fluginu sínu en allt fór þetta vel að lokum og tókst okkur að fá færðan til tímann okkar svo hann næði inn. Hann datt inn 15 mínútum fyrir flutning og gátum við því ekki æft mjög mikið en þrátt fyrir það gekk allt eins og í sögu. Set hérna mynd af eldhús borðinu kvöldið fyrir próf en þá var verið að prenta út ritgerðina, slædurnar og fleira og gekk á ýmsu :)
Kv, Bjarni Kr

Lína Rut yfirheyrði jólasveininn

2011-12-10T20:55:00.001Z

Þar kom að því að Lína Rut áttaði sig, enda hafði þetta verið frekar skrýtið allt saman með jólasveininn þetta árið. Hún skildi ekkert í því hvað þetta væri allt misjafnt á milli landa, Danski sveinninn gefur sumum í skóinn 24 sinnum, á meðan Íslenski sveinninn gefur bara 13 sinnum og svo gefur Hollenski sveinninn ekki neitt heldur gefa foreldrarnir bara aðventugjafir. Einn morguninn vaknaði hún og gekk á foreldrana með spurninguna sem má ekki segja upphátt :) Frúin á bænum setti andlitið í koddann og reyndi að sleppa við að svara á meðann pabbinn reyndi að halda aftur af brosinu og taka hvíta lygi á þessa spurningu. Eitthvað áttaði hún sig en sagði samt ekkert en svo seinnipartinn þegar hún var ein í bílnum með pabba sínum sagði hún að hún vissi þetta allt saman en við mættum gjarnan halda þessu áfram. Ævar Elí sagði að hún hefði verið búin að spyrja sig nokkrum sinnum líka en hann hafi alltaf reynt að skrökva, en nú er sem sagt ekki þörf á því lengur, en foreldrarnir halda uppi venjunum þessi jólin í það minnsta :) Enn eitt þroska stigið tekið hjá litlu stúlkunni okkar sem er að verða svo stór :)
Kv, Bjarni Kr

Annar í aðventu runninn upp

2011-12-04T15:40:00.001Z

Það má með sanni segja að tíminn fljúgi áfram og jólin í þann mund að skella á. Bóndinn á bænum hefur verið mjög annars hugar vegna námsefnis og lokaprófs sem sér þó senn fyrir endan á og Frú María hefur séð að mestu um jóla undirbúning, gjafir og innpökkun. Börnin stækka og stækka og minni spenningur gerir vart við sig og þó sérstaklega hjá Ævari Elí en samt er tilhlökkun fyrir aðfangadegi enn til staðar. Í skóinn og nammidagatalið er ekki að trufla stóra strákinn okkar en Lína Rut er hress á morgnana að hlaupa niður og opna "Pet shop" dagatalið en hún valdi það fram yfir nammi dagatal eins og í fyrra. Danski jólasveinninn gefur í skóinn frá fyrsta des og myndaðist smá misskilningur á bænum þegar krakkarnir í bekknum hennar Línu Rutar fóru að spyrja hvað hún hafi fengið í skóinn en þar sem hún er Íslensk koma Íslensku sveinarnir til hennar og því aðeins um að ræða 13 dögum fyrir jól, hún segist þó ætla að prófa hvort sá Danski hrökkvi í gang en ennþá hefur hún alltaf gleymt því áður en hún fer að sofa :) Um daginn heyrði ég að aðventu kertin hétu öll einhverjum nöfnum en það hafði ég aldrei heyrt áður svo ég stökk á internetið til að "Googla" svarið og það er samkvæmt þeirri leit minni svona:

"Fyrsta kertið er kallað Spádómskerti og minnir á spádóma Gamla testamentisins um frelsarann sem koma skyldi. Næsta kerti er kallað Betlehemskertið. Það leiðir hugann að bænum þar sem Jesús fæddist í fjárhúsi og var lagður í jötu. Þriðja kertið er Hirðakertið og minnir á hirðana sem voru fyrstu mennirnir sem heyrðu um fæðingu Jesú. Fjórða kertið er Englakertið og vísar til englanna sem birtust á jólanótt og sögðu frá því að Jesús væri fæddur."

Eftir rétt rúma viku héðan í frá verður undirritaður við kynningu á lokaverkefninu og þá er þessi hluti skólagöngunnar á enda og aðeins lokapróf í vor eftir og útskrift. Það er mikil tilhlökkun að koma huganum í smá frí frá þessum fræðum og njóta jólanna með fjölskyldunni og svo áramótanna með fjölskyldunni og tengdó þar sem hún er væntanleg til okkar í Grænhlíð yfir áramótin. Allt að gerast og áramótaheitin hrannast upp :)
Kv, Bjarni Kr

Jule-hygge

2011-11-30T20:14:00.001Z

Árlegt jóla kransa kvöld var haldið í skólanum hjá Línu Rut í kvöld. Hver fjölskylda greiddi smá aðgans eyri fyrir greni, leir, kaffi og eplaskífur auk þess sem hægt var að kaupa gos og bjór. Svo mættu allir með smá hluti og ílát til að búa til krans. Það var að sjá hjá sumum að þetta hefur verið gert í mörg ár enda gengu flestir beint til verks. Við hinsvegar vorum smá stund í gang en svo kom þetta og mæðgurnar græjuðu smá skreytingu á meðan bóndinn fékk einn kaldann :) Mjög skemmtilegt kvöld þar sem foreldrarnir gátu spjallað saman auk þess sem kennararnir mættu líka og var því hægt að fara aðeins yfir stöðuna gagnvart heimanámi og hegðun :) Skemmtilegar hefðir hjá Dönum og fín stemning. Kvöldið endaði svo á heimboði í næsta bæ sem er bara huggulegt að eiga inni svona í komandi jólamánuði :) Set hérna mynd af mæðgunum i stuði :)
Kv, Bjarni Kr

Unglingarnir okkar að mæta á svæðið :)

2011-11-27T11:45:00.001Z

Hjónakornin eru byrjuð að setja sig í stellingar vegna komu unglinganna á heimilið. Það styttist verulega í að Ævar Elí detti í unglinginn og eru nú þegar farin að sjást þess nokkur merki. Lína Rut fylgir ótrúlega mikið með og reynir allt sem hún getur til að halda í Ævar Elí. Nýjasta æðið hjá litlu stelpunni sem alltaf var svo kvöldsvæf er að reyna að fá að vaka lengur um helgar eins og bróðir sinn :) Henni hefur ekki tekist vel til hingað til en nú er að færast fjör í leikinn um helgar og í gærkveldi tókst þetta ágætlega hjá systkynunum. Upp úr miðnætti var þeim eitthvað órótt svo þeim datt í hug að fara í fótabað saman og fengu til þess allar græjur hjá mömmu sinni, sérstaka sápu í balann, fóta rasp og ýmsar græjur og sátu svo saman að horfa á sjónvarpið í fótabaði. Það er alveg yndislegt fyrir okkur foreldrana að fylgjast með þessum krílum sem eru svo góð hvort við annað og samrýmd. Öðru hvoru rifjast upp taktar úr okkar barnæsku enda förum við víst öll sama þroska veginn og ótrúlega margt sem er eins á milli kynslóða. Set hérna mynd þar sem yndislegu litlu ungarnir okkar sem eru svo sæt og fín eru í fótabaði um miðja nótt :)

Kv, Bjarni Kr

Öll dýrin í skóginum eru vinir

2011-11-27T11:40:00.001Z

Eða svona næstum öll þar sem Zorro litli kom fyrstur í Grænuhlíð og finnst þetta ákveðin réttinda missir að fá allan þennan skara inn á sig :) Hann er samt góður við dýrin en hatar ákveðna hluti eins og ef Lennon tekur beinið hans, ef að kisa leggst hjá honum og fer að mala en þá gjörsamlega brjálast hann og rekur hana í burtu. Lennon hnsvegar er hvolpur og skilur þetta ekki og er alveg sama um allt og alla svo framarlega að hann fái bara eitthvað að naga og borða. Set hérna mynd af Lennon litla með kisunni hans Ævars Elí "Sly" þar sem hún heldur utan um Lennon. Þetta er nú ekkert að trufla frú Maríu þar sem hún getur setið tímunum saman og fylgst með þessu atferli dýranna á milli en þau eru öll rosalega góð saman.
Kv, Bjarni Kr

Ronja kvödd með trega

2011-11-27T11:29:00.001Z

Þá er Ronja litla eða réttara sagt stóra farin heim til Íslands eftir dvölina í Grænuhlíð. Lína Rut tók miklu ástfóstri við hana og auðvitað frúin á bænum líka en hún tekur ástfóstri við öll dýr, hvort sem þau eru stór eða smá, gæludýr eða villdýr :) Lína Rut talaði strax um að hún þyrfti að eiga svona kisu og sagði hátt og snjallt um daginn "Þegar Ronja fer ætla ég að kaupa mér Main coon kisu" Hún er alltaf jafn ákveðin þessi litla elska :) Set hérna mynd af Línu Rut að kveðja Ronju.
Kv, Bjarni Kr

Frú María kvaddi auðvitað líka :)

2011-11-27T11:00:00.000Z

Ævar Elí kvaddi auðvitað líka :)

2011-11-27T10:00:00.000Z

Árlegt jólaföndur

2011-11-23T09:02:00.001Z

Frú María klikkar ekkert á jólaföndrinu þetta árið frekar en önnur ár. Þetta er að verða svona ákveðin hefð hjá fjölskyldunni og setur jólin af stað. Börnin eru voða áhugasöm um þetta en þó má finna fyrir dvínandi áhuga hjá Ævari Elí enda að verða 13 ára og tölvan er mest spennandi þessa dagana. Jóla undirbúningurinn er í seinna lagi þetta árið en í staðin eru jólagjafirnar í fyrra fallinu þar sem það þarf að senda til Íslands þannig að þetta hefur aðeins snúist við. Hinsvegar er þetta svakalega góð þróun þar sem mjög gott er að vera búinn með jólagjafirnar svo hægt sé að njóta aðventunnar án þess að vera sífellt að hlaupa eftir einhverjum pökkum :) Fyrstu 2 sunnudagarnir í aðventunni eru þó ekki alger slökun þar sem það er lokapróf hjá bóndanum sem verður vonandi lokið í kringum 14 des og þá verður hægt að slaka algerlega á :) Frú María notar tímann í jólaþrifin á meðan bóndinn klárar lokaprófið þannig að stefnan er að frá 14 des verði bara setið við arineld og beðið eftir komu jólanna :) Set hérna myndir af jólaföndrinu í ár og litlu grislingunum okkar sem eru samt að verða svo stór.
Kv, Bjarni Kr

Allir mjög einbeyttir að föndra :)

2011-11-23T09:00:00.000Z

Tækniöld

2011-11-18T09:35:00.001Z

Það er alveg klárt að tæknin er að vinna með okkur í viðfangsefninu að "búa erlendis", en krakkarnir okkar leika í tölvunni á kvöldin við vini sína, þökk sé tækninni. Nú er Lína Rut komin á fullt í skemmtilegum tölvuleik með bróður sínum þar sem verið er að byggja hús og hanna garða og allt gerist þetta "online" Ekkert, eða allavega mjög lítið, ofbeldi og virkilega uppbyggjandi auk þess sem þau tala saman með því að skrifa hjá hvort öðru og læra þannig að skrifa a lyklaborð og/eða tala í Skype á meðan þau leika. Svakalega gaman að heyra i þeim á kvöldin hlægja og skríkja saman með vinum sínum frá Selfossi og víðar. Ævar Elí byggir upp og hugsar mjög "stratigískt" en Lína Rut vafrar bara um, smíðar hús og pælir mikið í litnum á húsinu og að það séu blóm í garðinum en þarna sér maður klárlega muninn á kynjunum. Til stendur að útbúa þeirra eigin server um helgina en það er einsskonar þeirra eigin bær á netinu sem vinirnir geta heimsótt. Bara gaman og gott fyrir þau og þetta viðheldur íslenskunni og foreldrarnir geta gripið frammí og leiðrétt þegar sagt er ég meiddi mig í "Fótinum", þá gjamma foreldrarnir alltaf frammí og segja "Fætinum" Ævar Elí :) Góðir tímar hjá fólkinu i Grænuhlíð og fjölskyldan búin að þjappa sér saman á erlendri grund sem er voða gott. Set hérna mynd af Línu Rut í leiknum "Minecraft" með popp og kók eins og sannur tölvunörd :)
Kv, Bjarni Kr

Veturinn kominn í Grænuhlíð

2011-11-18T08:54:00.001Z

Þá er fyrsta næturfrostið komið með tilheyrandi kælingu innandyra hjá okkur í Grænuhlíð. Á mánudaginn kom hrímþoka yfir sveitina og daginn eftir var grasið vel hrímað og heimilisfólkið vaknaði upp með frosið nef enda hefur ekki verið kveikt á ofnum ennþá. Olíukostnaðurinn er alveg rosalega hár og því er dregið í lengstu lög að kveikja á þeim og þess í stað er kamínan óspart notuð enda er það ódýr og góður kostur við upphitun en ekki síður kósí. Við höfum farið á næsta bæ og fengið brenni þetta haustið, bóndinn í Grænuhlíð fer vopnaður keðjusög og fellir tré og brytjar niður í kubba og svo lánar bóndinn okkur traktorinn sinn til að flytja þetta heim. Sem sagt skemmtileg tilbreyting frá því að hafa heitt vatn mallandi í gólfhita allan ársins hring heima á Íslandi en að sama skapi kann maður að meta þau þægindi enn betur eftir svona upplifun. Frú María saknar þess ansi oft að komast ekki í sjóðandi heitt freyðibað en þess í stað verðum við bara að fara í sundlaugina og nota heita pottinn :) Nú er sem sagt kominn vetur ef vetur mætti kalla en allavega orðið vel kalt hjá okkur og krakkarnir þurfa orðið húfu og vettlinga með í skólann og leika mun minna úti. Ég náði ansi skemmtilegri mynd úr hrímþokunni á mánudagskvöldið þegar ég fór út að sækja kubba í kamínuna. Úti var alveg svarta myrkur en það var ljós í baðherberginu og það geislaði í hrímþokunni, auðvitað var þetta enn fallegra í raunveruleikanum en á mynd en engu að síður sést aðeins hvernig þetta kom út :) Það mætti halda að Jesús sjalfur væri á klósettinu í Grænuhlíð :)
Kv, Bjarni Kr

11.11.11.

2011-11-11T09:09:00.000Z

20 ára samvistar afmæli okkar Ólafar Maríu, skemmtileg dagsetning og hún er okkar, en á þessum degi fyrir 20 árum byrjuðum við Ólöf María saman eins og það var kallað þá :) Plan dagsins var að fara til BORA BORA en þar sem eiginmaðurinn er í námi verður það að bíða betri tíma en við eigum eftir að standa við það plan seinna ;) Við höfum átt yndisleg ár saman, eignast 2 fullkomin börn, átt gott samband við fjölskyldu og vini og síðast en ekki síst höfum við notið góðu stundana í lífinu og barist saman við þær erfiðu. Um þessar mundir erum við að lifa sameiginlegan draum, að prófa að búa erlendis, og það hefur komið okkur verulega á óvart að mörgu leiti. Í fyrsta lagi hefur það verið skemmtilegra og auðveldara en við áttum von á og því hefur þessi tími verið ótrúlegur fyrir alla fjölskyldu meðlimi. Í öðru lagi hefur þetta opnað fyrir okkur margar nýjar dyr og sjóndeildar hringurinn er mun stærri og fer sífellt stækkandi. Í þriðja lagi höfum við náð tökum á nýju tungumáli og eignast nýja vini. Og í fjórða lagi hefur þetta gert okkur öllum gott til frambúðar þar sem það er mjög gott að stíga út fyrir þæginda hringinn og sjá hvað maður er í raun og veru sterkur. Frá því ég sá sætu stelpuna í Miðtúninu fyrst, varð ég ástfanginn á augabragði, en fannst ég ekki getað átt kærustu sem væri 15 ára, verandi sjálfur 21 og því barðist ég gegn því í smá stund. Hinsvegar sáu örlögin ( 78 módelið af Chevy Nova, 4ra dyra, 6 manna og sjálfskipt í stýri ) um að leiðir okkar lágu saman og við það var ekki ráðið og því fór sem fór að við ákváðum að byrja saman. Vinum mínum leist ekkert á þetta samband né tengdamömmu, en við blésum á þetta allt saman og sjáum ekki eftir því í dag. Yndisleg 20 ár að baki með elskunni minni og margir tugir til að hlakka til framundan saman. Í dag hafa allir vinir okkar tekið til baka það sem þeim fannst um sambandið og tengdamamma er búin að samþykkja tengdasoninn ;)

"Elsku besta Ólöf María, takk fyrir árin 20, nú er hafinn nýr kafli, saman á erlendri grund, og ný ævintýri og verkefni bíða okkar á komandi áratugum. Mig hlakkar til allra tuganna sem við eigum eftir að vera saman og allra verkefnanna sem bíða okkar. Ég elska þig út fyrir endimörk alheimsins"

Kv, Bjarni Kr

Afmælisgjöfin frá Mömmu tilbúin :)

2011-11-07T09:04:00.001Z

Þá er 2ja mánaða ferli lokið við uppgerð á 100 ára gömlum skenk sem mamma gaf mér í afmælisgjöf :) Búin að pússa, grunna, líma, herða, smíða, viðra og mála ásamt ýmsum öðrum smáverkum sem svona ferli fylgir. Útkoman er hreinn unaður eftir blóð, svita og tár ;) Vantar bara höldur á skápahurðirnar og þá er verkið fullkomnað. Næsta verk er að raða sparistellinu í skenkinn hér í eldhúsinu. Takk elsku mamma fyrir mig <3

Kv, Ólöf María
( Hægt að smella á myndirnar til að stækka :)

Skenkurinn - nærmynd af borðplötu

2011-11-07T09:03:00.000Z

Skenkurinn - sátt og sæl :)

2011-11-07T09:02:00.000Z

Skenkurinn - í vinnslu

2011-11-07T09:01:00.000Z

Skenkurinn - fyrir uppgerðarferli

2011-11-07T09:00:00.000Z

Ronja Ræningjadóttir

2011-11-05T14:43:00.001Z

Nú styttist óðum í að Ronja litla fari frá okkur en hún stefnir heim til Íslands og ætlar sér að hefja nám á Bifröst. Ronja hefur sigrað hjörtu heimilisfólksins með óvenjulegri hegðun. Hún er algerlega sú óvenjulegasta kisa sem við höfum nokkurntíman umgengist en á mjög skemmtilegan hátt. Hún er af tegundinni Main Coon og er því svona mitt á milli hunda og katta í atferli og hafa verið ófáar stundirnar þar sem hún hefur skemmt okkur með ýmsum uppátækjum. Hún er mjög mikil félagsvera og eltir okkur hvert fótmál í húsinu og sefur uppá borðum ef við erum að vinna og þá helst sem næst okkur. Það verður mikil breyting þegar hún fer og hefur Lína Rut nú þegar ákveðið að hún þurfi að fá svona kisu þar sem þær séu svo skemmtilegar. Set hérna mynd af Ronju frá í dag þar sem hún sofnaði á nýju kommóðunni á meðan fólkið var að jólaföndra á borðinu við hliðina :)
Kv, Bjarni Kr

Ronja að vakna

2011-11-05T13:47:00.000Z

Ferlega falleg, róleg og skemmtileg kisa. Hér er hún að rísa upp eftir svefninn á kommóðunni í dag :)
Kv, Bjarni Kr

Pabbi, hvað er Guð ?

2011-11-05T10:03:00.003Z

Það kom ansi skemmtileg umræða á borð foreldranna í vikunni þegar Lína Rut bað okkur um að skilgreina Guð. Þar sem við viljum ekki vera leiðandi reyndum við að fá hana til að mynda sér sjálfstæða skoðun og sögðum henni að það væru til margir Guð-ir og misjafnt hvað fólk trúir. T.d. væri til Guð eins og við þekkjum hann en síðan væri til Buddha, Alla og margir fleiri sem fólk myndi trúa á, allt eftir því hvað viðkomandi vill sjálfur. Lína Rut hugsaði sig um í smá stund og kom svo með sína útgáfu eins og henni einni er lagið en í svona aðstæðum fer hún oft ótroðnar slóðir og virðist vera ótrúlega sjálfstæð í skoðanamyndun. Hún sagði að hún vildi trúa á Bassa, að hennar Guð ætti að heita Bassi og hann væri eins og gítar í útliti og væri blár á litinn. Hún ætlaði að biðja til Bassa þegar hana vantaði styrk til að framkvæma eitthvað og Bassi væri bara ótrúlega góður Guð. Foreldrarnir reyndu að halda andliti en án árangurs en gerðu þó gott úr þessu öllu og hvöttu litlu stúbbuna til að trúa bara því sem hún vildi. Ótrúlega mikið um að vera hjá henni í líkamlegum þroska þessa dagana og greinilega ekki síður í andlegum þroska.
Kv, Bjarni Kr

Mesta vitleysan á bænum

2011-10-12T06:58:00.000Z

Lennon eða Lennmundur eins og hann er stundum kallaður fær stimpilinn "mesta vitleysan" þessa dagana. Nú er að koma að því að hann missi barnatennurnar og því er nagþörfin á við 14 hunda og það er ekkert sem fær hann stöðvað. Hann stelur hlutum og hoppar með þá í bælið sitt eins og um "Stikk" sé að ræða og heldur að þar fái hann bara frið til að naga :) Hann hamast í kettlingunum og Zorro með miklum látum og galsagangi og er nú svo komið að Zorro finnst stundum nóg um og urrar og bítur frá sér enda er hann heldri maður og þarf sína hvíld og frið. Litla vitleysan okkar er að æfa sig að hoppa upp í sófa og oft með tilheyrandi bakflippum enda er hann enn frekar linur og lítill. Þrátt fyrir stuðið og stemninguna er alveg einstaklega skemmtilegt að taka þátt í svona ferli og nú sjáum við frammá að hann er að þroskast hratt og verður fljótlega kominn á svipað ról og Zorro. Sem sagt líf og fjör í Grænuhlíð að vanda :) Set hérna mynd af litla unganum okkar þar sem sést greinilega að þroskinn er að koma og litla barna andlitið að víkja.
Kv, Bjarni Kr

Gulrótar uppskeran

2011-10-09T18:33:00.001Z

Í gær fórum við út og tókum upp restina af gulrótunum okkar þar sem hitastigið lækkar ört á nóttunni og við vildum ná öllu inn fyrir frost. Krakkarnir tóku auðvitað virkan þátt og tóku upp, klipptu grasið af og gáfu hænunum það auðvitað og fóru svo inn með afraksturinn og þrifu allt saman í vaskinum. Uppskeran var í minna lagi þar sem við völdum ekki nógu sólríkan stað fyrir beðið en við lærðum af reynslunni og lögum það fyrir næsta sumar. Þegar þetta er skrifað er fólkið sest að snæðingi með nýtíndar gulrætur í skál og Voga ídýfu :)

Kv, Bjarni Kr

Litlu sætu hendurnar hennar Línu Rutar :)

2011-10-09T18:31:00.000Z

Lína Rut vildi eiga allar minnstu og skola þær í sér glasi og borða jafn óðum, ekkert yndislegra en svona verkefni með litlu ungunum sínum :)
Kv, Bjarni Kr

Ævar Elí þurfti líka að smakka nokkrar :)

2011-10-09T18:30:00.000Z

Sumar voru skrýtnar í laginu :)

2011-10-09T18:25:00.000Z

Fegursta blómið okkar :)

2011-10-07T18:35:00.000Z

Mamman á bænum fékk smá húsmæðra-orlof og skrapp til Íslands. Til stendur að heimsækja fjölskyldu, vini og alla sem verða á vegi hennar á skerinu góða. Litla fjölskyldan í Grænuhlíð verður því að treysta að öllu leiti á heimilisföðurinn hvað varðar þvotta, mat, náttföt, tannburstun og svo mætti lengi telja en auðvitað fer það allt vel. Fyrsta kvöldmáltíðin okkar án mömmunnar snérist um það að allir söknuðu mömmu og hversu mikilvæg hún væri í okkar lífi. Ævar Elí fór að reikna út hvað honum fyndist um skiptinguna á mikilvægi milli pabba og mömmu og endaði með að komast að þeirri niðurstöðu að líklega væri mamma svona 3/4 mikilvæg og pabbi svona 1/4 en þessari pælingu fylgdi samt að hann elskaði þau jafn mikið ( alltaf svo dipló litli prinsinn minn :) Heilgrillaður kjúlli og franskar í matinn og svo sjónvarpskvöld framundan með von um að allir nái að sofna þó mamman sé af bæ. Frú María er með plön um að koma Maríu Katrínu vinkonu sinni á óvart og eigum við von á ansi miklu stuði þegar þær hittast óvænt á morgun með tilheyrandi skvísu skrækjum. Set hérna mynd af blómarósinni okkar sem við söknum nú þegar en við vitum að hún mun eiga góða viku á Íslandinu góða hjá mömmu sinni sem dekrar hana örugglega upp úr skónum enda er Ólöf María uppáhalds dóttirin hennar ;)

Kv, Bjarni Kr

Zorro hefur eignast vin :)

2011-10-07T12:55:00.002Z

Lífið hjá einka-hunda-syninum breyttist þó nokkuð við það að flytja á erlenda grund fyrir ári síðan. Hann hefur þurft að sæta samlyndi við fullt af dýrum í sveitinni, bæði stórum sem smáum og nú það nýjasta er að þessi kisa er gjörsamlega að taka ástfóstri við Zorro og Ævar Elí. Hún var talin vera strákur í byrjun og Ævar Elí gaf henni nafnið Sly eftir tölvuleikja-goði af Youtube ... það kom svo síðar í ljós að um stelpu væri að ræða en við breyttum bara og segjum, hún Sly í stað þess að skipta um nafn :) Sly litla er rosalega blíð og góð og varð fyrir smá árás þegar hún var kettlingur og þess vegna var henni hjúkrað meira en öðrum kisum á bænum og því fylgdi auðvitað gagnkvæm ást og hún neitar að fara frá okkur. Ævar Elí er búinn að óska sér þess að fá að eiga hana og nú hefur hún toppað sig eftir að hún náði að gera Zorro að besta vini sínum en þá er auðvitað ekki aftur snúið og ákveðið hefur verið að hún fái að búa hjá okkur á meðan við búum í Danmörku. Zorro og Sly sofa saman í stólnum á daginn, hún labbar að honum og merkir hann á hverjum morgni þegar hún vaknar og hann er hinn sáttasti með þetta ástand enda búinn að átta sig á því að hann yrði ekki einkasonur alla tíð. Set hérna eina mynd af mörgum sem við eigum af þeim saman og líklega ekki þeirri síðustu :) Þeir sem þekkja til gætu haldið að Lína gamla væri flutt til okkar aftur en það er kisan sem frú María átti frá 6 ára aldri :)

Kv, Bjarni Kr

Lennon litla líður vel hjá okkur

2011-10-03T09:25:00.000Z

Lennon litli kom sá og sigraði hjörtu allra fjölskyldumeðlima og Zorro er svo hamingjusamur að hafa hann enda sofa þeir saman, leika saman, borða saman og gera nánast allt saman. Zorro er að upplagi mjög duglegur og að fá hvolp inn í sitt líf breytti mörgu enda er ekki hægt að sofa og hvíla sig öllum stundum því litli maðurinn vill leika sér mjög mikið. Zorro tekur fullan þátt í því og má sjá miklar framfarir hjá litla manninum enda þarf hann að berjast við pabba sinn sem er oft ójafn leikur. Þeir eru svakalega góðir saman og litli maðurinn græðir á því að eiga svona stilltan og góðan pabba sem kennir honum öll hundatrixin. Á köflum er Lennon stilltari enda er Zorro mjög sjálfstæður og fer oft sínar eigin leiðir :) Að loknum klukkutíma hunda eltingaleik og slagsmála eru það svona augnablik sem þetta hérna á myndinni sem fá alla til að sitja og dáðst að strákunum okkar enda eru þeir frábærir félagar.
Kv, Bjarni Kr

Litla 8 ára stúbban okkar :)

2011-10-02T09:52:00.001Z

Lína Rut vaknaði í morgun, hress og kát og byrjaði að æfa lagið sitt, spá í fötum sem hún ætlaði að klæðast í söngvakeppninni og svo fr. Þegar fór að líða nær tímasetningunni brotnaði litla skinnið okkar saman og fór að gráta og sagði að hana langaði rosalega að taka þátt en það væri bara svo erfitt þar sem hún væri svo stressuð yfir þessu öllu saman. Foreldrarnir bökkuðu að sjálfsögðu litluna sína upp í því að hætta bara við þó það hafi tekið pabbann lengri tíma að sættast á það að gefast upp en auðvitað gengur líðan barnanna framar öllu tali um uppgjöf eða keppnissskap. Litlan tók þetta svo nærri sér að hún vill ekki einu sinni fara og sjá hina keppendurna svo í staðinn verður bara rólegur sunnudagur í Grænuhlíð. Set hérna mynd af litlunni okkar frá í sumar :)
Kv, Bjarni Kr

Vér mótmælum allir

2011-10-01T13:25:00.000Z

Í grænuhlíð er um 25 stiga hiti, logn og blíða og heimilisfólkið á erfitt með að vera innandyra í slíku veðri. Frúin smellti sér út og vinnur hörðum höndum við að pússa spegil sem til stendur að mála. Dýrin á bænum liggja öll í sólinni og njóta þess að láta baka sig og bóndinn planleggur að fara í beðahreinsun til þess eins að geta verið úti við. Yndislegt veður á þessum annars merka degi í sögu Íslandssögunnar þegar þjóðin segir samróma "Vér mótmælum öll" á Austurvelli. Það kæmi mér ekki á óvart þó færi að styttast í stjórnarskipti og þá mun ég klárlega kjósa Besta flokkinn á landsvísu enda mun ég á engan hátt geta stutt mína menn við núverandi óstjórn né annan flokk og tel fulla þörf á því að gamla flokks systemið verði stokkað upp með því að fá Besta á þing, er tilbúinn til að gefa kost á mér eingöngu til þess að leggja því lið að breyta Íslandssögunni. Set hérna mynd af frú Maríu frá því í sumar en þarna er á ferðinni kona sem á heima í stjórnmálum af myndinni að dæma, eða gæti allavega sómað sér vel sem þingmannsfrú :)
Kv, Bjarni Kr

Söngvakeppni framundan

2011-09-29T07:37:00.002Z

Næsta sunnudag ætlar litla stúlkan okkar að taka þátt í smá söngvakeppni a torginu í Give. MGP er einhver barna söngvara keppni og höfum við oft séð í sjónvarpinu frá því, en þetta er samt bara svona smá útidúr þar sem "Samtök verslunareigenda" eru að búa til smá show með Söru sem vann X-Faktor í fyrra og bæta svo inn smá hæfileika keppni. Þó á að setja upp svið og ljósabúnað og allar græjur svo þetta verður gaman fyrir Línu Rut að fá að prófa. Hún ætlar að syngja lagið Jar of hearts sem er fullorðins og hún æfir stöðugt textann sem er á ensku og nú er bara að vona að allt gangi vel. Pabbinn ætlar að reyna að taka þetta upp a video ef það er hægt og þá fá allir að sjá litlu Stúbbuna okkar. Set hérna mynd af henni að lesa en nú er í gangi þemadagar í skólanum og allir æfa sig extra mikið að lesa, hún tekur þessu mjög alvarlega og les i rútunni á leið heim úr skólanum og í stólnum heima og nú er bara að hvetja hana enda er ekkert auðvelt fyrir 8 ára að lesa erfiðar bækur á Dönsku en þetta geta þau samt eftir aðeins 1 ár í DK.
Kv, Bjarni Kr

Tengdó á afmæli í dag :)

2011-09-27T14:45:00.006Z

Hún Lína amma á afmæli í dag og maður má nú til með að skrá það hjá sér hérna á blogginu enda ber hún titilinn minn sem "Besta tengdamamman" og ég á móti ber titilinn hjá henni "Besti tengdasonurinn" - Saman erum við sem sagt best og þá er mjög líklegt að við kjósum bæði Besta flokkin í næstu kosningum :) Þegar Lína kom til okkar síðasta sumar var henni stillt við saumavélina og látin gera við allar buxurnar mínar enda hafði hún ekki heimsótt okkur í 1 ár og því var verulega farið að safnast í bunkann við saumavélina, Lína er klók og bauð systur sinni í heimsókn enda fer þar mikil saumakona og þetta vafðist ekki fyrir þeim systrum. Þess á milli var Línu stillt við eldavélina og hún hristi fram hverja máltíðina á fætur annari enda hámenntuð í þeim fræðum úr Dönskum Húsmæðraskóla. Ef hún var ekki að sauma eða elda þá var hún að prjóna, eða horfa á barnabörnin hoppa á trampólíninu og tók auðvitað þátt í því með krökkunum enda ung í anda sú gamla ;) Það voru skemmtilegar 4 vikur sem við áttum saman í sumarfríinu og ófáar rauðvínsflöskurnar sem við drukkum með dýrindis steikunum og er heimilisfólkið farið að óska þess að amma fari að koma aftur í heimsókn til okkar í sveitasæluna. Lína okkar "Innilega til hamingju með daginn þinn og njóttu þess að láta Jean dekra við þig, við hefðum gert það ef þú værir hjá okkur en við munum bara gera það þegar þú kemur næst í heimsókn, þú ert ávalt velkomin og næst verða engar buxur við saumavélina :)" Kv, Bjarni, Stúbba, Ævar Elí, Lína Rut, Zorro og Lennon

Danmörk heillar :)

2011-09-26T20:40:00.001Z

Við hjónakornin rúntuðum í sveitum Danmerkur um daginn og á vegi okkar varð þessi gamli maður sem greinilega er jólatrjáa bóndi ef dæma má af sveitinni hans. Um allt voru jólatré og í raun eins langt og augað eygði. Gamli maðurinn var samt ekkert að splæsa í nýjan traktor og rúntaði um á þeim gamla. Svakalega flott sveit og þetta er eitthvað sem heillar Grænuhlíðarfólkið verulega mikið. ( Hægt að smella á myndirnar til að stækka )

Kv, Bjarni Kr

Elskulega dóttir mín

2011-09-25T07:10:00.002Z

Hún Lína Rut stækkar svo hratt, og þroskast auðvitað jafnhratt, að foreldrarnir eru varla að ná að fylgja henni þessa dagana og í raun síðastliðið ár. Danmörk hefur haft virkilega góð áhrif á "litluna" okkar og hér hefur hún blómstrað. Hún er vinamörg í skólanum og vel liðin, er dugleg að læra og nýtur þess að vera til. Söngáhuginn minnkar ekkert og er að þróast með hverri vikunni sem líður og nú er svo komið að hún æfir söngfléttur eins og frægu söngkonurnar syngja, ekki alltaf það sem foreldrunum finnst passa enda er litla, tæra, barnalega, söngröddin það sem hverju foreldri finnst fallegast :) Stefnan er tekin á smá söngkeppni í Give eftir 2 vikur og æfir hún sig smá á hverjum degi en alltaf í aðra átt en foreldrunum líkar en auðvitað verður litla skvísan okkar að fá að fara sínar eigin leiðir. Pabbinn reynir að hvetja hana og lauma inn setningum eins og "er þetta ekki aðeins of mikið skraut í einni línu" og svo framvegis með von um að hún finni leiðina aftur í þá söngrödd sem er hennar. Allt hefst þetta og það verður gaman að fylgjast með henni í söngvakeppninni. Hún á það til að guggna á síðustu stundu í aðstæðum sem þessum en virðist vera nokkuð staðföst um þessar mundir að klára þetta. Set hérna mynd af okkur feðginum frá í gær en það skortir ekki ást og umhyggju hjá þessari elskulegu dóttur okkar, alltaf jafn elskuleg og góð :)
Kv, Bjarni Kr

Afmælisstelpan á bænum :)

2011-09-14T17:54:00.000Z

Ólöf María hélt látlausa afmælisveislu þrátt fyrir að um stórafmæli væri að ræða en að þessu sinni var það aðeins stórfjölskyldan sem fagnaði þessum merku tímamótum :) Þegar börnin okkar vöknuðu mættu þau í svefnherbergið og sungu afmælissönginn áður en daglegu verkefnin hófust og allir fóru í skólann. Þegar krakkarnir komu heim úr skólanum var Ævar Elí snöggur að fatta að hann átti möffins sem hann hafði bakað í matreiðslu og smellti einu kerti á það og svo var afmælissöngurinn sunginn aftur. Auk þess höfðu þau i samvinnu við pabbann keypt smá gjöf sem var afhent við sama tilefni. Svo skemmtilega vildi til að frúin hafði, helgina áður, keypt sér stálbakka á loppemarkaði og fundum við bolla í stíl sem hittu alveg í mark :) Seinna um kvöldið var svo Nachos partý að hætti krakkanna og fullkomnaði það daginn fyrir ungana okkar en það er jú besta afmælisgjöfin að ungarnir séu glaðir :) Set hérna nokkrar myndir af fjörinu um leið og ég óska frú Maríu til hamingju með árin 35 :)
Kv, Bjarni Kr

Afmælisgjöfin frá mömmu :)

2011-09-14T16:58:00.000Z

Afmælis-Stúbban fékk pening frá mömmu sinni í afmælisgjöf og var ekki lengi að þefa uppi gamlan antikskenk sem þurfti á uppgerð og málningu að halda svo hann passaði i umhverfið hennar. Set hérna nokkrar myndir af skápnum og fyrstu skrefum i uppgerðar ferlinu :)

Kv, Bjarni Kr

Magnað sumarfrí á enda

2011-08-14T12:33:00.005Z

Sumarið 2011 hefur verið viðburðaríkt hjá okkur hérna í Grænuhlíð. Mikill gestagangur, grín og glens hefur einkennt tímabilið og voru mest 14 manns í einu sem gistu hjá okkur. Þessum gestagangi fylgdi einnig að minna fór fyrir bloggfærslum frá húsbóndanum en nú verður bætt úr því. Fyrsti gesturinn var Lína amma en hún kom um miðjan júní og var hjá okkur í 4 vikur, viku seinna kom svo Jean og sömu helgi komu Sirrý, Nonni, Hanna, Viktor, Rakel og Aníta. Í byrjun júlí komu svo Guðmundur Bjarki og Agla Bríet í heimsókn til krakkanna og voru í tvær vikur með tilheyrandi stuði og var það kærkomið hjá Ævari Elí og Línu Rut að fá Íslenska krakka í heimsókn. Í byrjun júlí kom svo Jóna Guðný og mamma hennar sem fékk viðurnefnið "Lilla" enda hafði hún mikið dálæti á fjólubláum lit í ferðinni. Að þessu öllu loknu komu svo vinir okkar Gestur Már, María Katrín, Gunnar Gauti og Hákon Garri. Set hérna mynd af frú Maríu í hrókasamræðum við frú Maríu í einni af skógargöngunum sem farið var í þetta sumarið.

Kv, Bjarni Kr

Lokaprófið

2011-06-10T07:26:00.003Z

Þá er önn 2 lokið eftir langan próf undirbúning í hóp með 2 öðrum. Við skiluðum inn risastóru verkefni á réttum tíma og var ég bara nokkuð sáttur við útkomuna. Eftir að hafa fengið hæstu einkun síðast var meiri pressa á að fá aftur það besta og því urðu það þónokkur vonbrigði að fá bara þriðju hæstu einkun eða 8 á íslenskum skala. Kennararnir sáu greinilega hversu vonsvikinn ég var og fóru að útskýra fyrir mér að þetta væri virkilega góð frammistaða en það breytti engu ha ha ah. Eftir að hafa eytt hluta af deginum í gær í að vera vonsvikinn hresstist ég allur við og ekki síður þegar ég fór að heyra hvað hinir í skólanum fengu en mjög margir eru að fá 5 og 6 þannig að kanski á maður bara að vera sáttur við 8 :) Þetta er samt svona lúxus vandamál að vera ósáttur við að fá 8 en svona er þetta bara, metnaðurinn er hár og maður vill gera sitt besta. Kennararnir töluðu um að önn tvo væri einsskonar sía og væri mesta brottfallið úr skólanum eftir önn 2 þar sem það væri tekið fastari tökum. Aukalega í vörninni var maður frá Danska ríkinu og því enn meiri pressa á kennarana að vera extra harðir í dómgæslunni þannig að niðurstaðan er 8 fyrir aðra önn og er ég bara orðinn nokkuð sáttur við það í dag. Nú tekur við sumarfrí með heljarinnar miklum gestagangi þar sem ansi margir eru á leið til okkar í sumar en samt verður reynt að slaka aðeins á vinna í garðinum og ekki síður að lesa svolítið fyrir önn 3 til að undirbúa sig vel fyrir komandi átök. Set hérna dæmigerða mynd af verkefna skilum frá í vetur þar sem ég gleymdi að taka mynd af lokaverkefninu en þessi staður í húsinu er búinn að vera minn griðarstaður við lærdóminn síðastliðið ár og hefur frúin alltaf passað uppá að það séu fallegar luktir og kertaljós hjá mér til að róa mig niður :)

Kv, Bjarni Kr

Pappírsbrúðkaup

2011-06-05T05:56:00.005Z

Í dag eigum við Ólöf María pappírsbrúðkaup og eins og nafnið gefur til kynna er ekki langt um liðið frá giftingunni og þeir sem þekkja okkur vita að þetta táknar 1 árs brúðkaupsafmæli. Það er eins og það hafi gerst í gær, að við fórum í kirkjuna okkar og gengum í það heilaga á sólríkum og björtum sumardegi. Brúðurin var fullkomin, dagurinn var fullkominn, veislan var fullkomin, myndatakan var fullkomin og allir vinir okkar voru fullkomnir enda var ákvörðunin fullkomin að ganga í það heilaga á þessum tímamótum. Fyrir mér tókst þessi dagur í alla staði frábærlega og allt gekk upp þrátt fyrir stuttan fyrirvara og verandi á leið til útlanda með tilheyrandi búslóða flutningum. Við fengum sólríkan dag og gott veður, við fengum að njóta samverustunda með vinum okkar þar sem einhugur og sérstök vináttu stemning sveif yfir vötnum, bæði í kirkjunni og veislunni. Við fengum svo að sofa/gista í litlu húsi á Eyrabakka á brúðkaupsnóttina en þannig byrjaði þetta jú allt saman hjá okkur, í Bjarghúsi. Við ókum um á amerískum kagga og okkur leið eins og kóngi og drottningu allan daginn. Yndislegur dagur, yndisleg ákvörðun og síðast en ekki síst "Yndisleg brúður"

1 stk búðkaup gerist ekki af sjálfum sér og stóðu mæður okkar við bakið á okkur allan tímann og pössuðu uppá að allt gengi upp, bæði við undirbúning og á sjálfan brúðkaupsdaginn, þær voru mættar eldsnemma til að hjálpa brúðinni í kjólinn, hneppa skyrtunni á brúðguman, passa börnin og sjá um að allt gengi upp. Feðurnir stóðu sína pligt og stóð faðir brúðgumans honum við hlið og passaði uppá að brúðguminn myndi ekki líða útaf og faðir brúðarinnar stóð sig með eindæmum vel þegar þau feðgin gengu inn kirkjugólfið. Vinir okkar Gestur Már og María Katrín fullkomnuðu vináttu tengslin enda var um þvílíkan stuðning að ræða að orð fá ekki lýst. Giftingin fór fram í kirkjunni okkar, Selfosskirkju. Veislan fór fram í elsta húsi bæjarins "Tryggvaskála" sem og er frá sama tímabili og fyrsta húsið okkar á Eyrabakka og þessi byggingastíll í miklu uppáhaldi hjá okkur, og því staðsetningin vel við hæfi, svo ekki sé minnst á að í þessu sama húsi hóf móðir brúðgumans sinn vinnuferil og líklegt þykir að brúðguminn hafi komið undir í einu af herbergjum hússins :) Brúðurin er mjög vön að halda veislur en ekki vön að halda veislu og geta ekki séð um allt sjálf en þar kom Ásta Björg henni til halds og traust og gekk veislan 100% upp. Myndatakan fór fram fyrir utan kirkjuna okkar þar sem við vorum bæði skírð og fermd og því allt gert til að halda í heimahagana. Þegar þessu var svo öllu raðað saman fór í hönd yndislegur og fullkominn dagur. Til þess að fullkomna augnablikið okkar ákváðum við að fara örlítið óhefðbundna leið hvað varðar innkomu brúðarinnar inn kirkjugólfið. Í stað brúðarmars spilað á orgel fengum við fiðluleikara sem setti svo hátíðlegan blæ á kirkjuna að mestu karlremburnar í hópnum fóru hágrátandi út. Fiðluleikarinn stóð sig með svo stakri prýði að fólk almennt var með gæsahúð langt fram eftir viku, sérstaklega þegar lagið okkar var spilað en það er magnþrungið og fallegt lag sem hafði mikil áhrif á alla - Canon in D - Orðið sem situr eftir er einfaldlega "Fullkomnun" og á það við daginn í heild sinni og þó sérstaklega brúðina sem bar af öllum öðrum brúðum á þessari jörð.

Fyrsta árið okkar sem hjón hefur verið bæði skemmtilegt og viðburðaríkt enda fluttumst við frá heimahögunum aðeins 3 dögum eftir brúðkaup, þar sem við kvöddum alla vini okkar, ættingja og heimahagana og héldum á vit ævintýranna í Danmörku. Brúðguminn hefur stundað nám í 1 ár og brúðurin hefur unnið að hugðarefnum sínum í sveitinni við uppgerð antík muna og síðast en ekki síst, passað litlu gullmolana okkar og kennt þeim alla þá siði og fræði sem börn þurfa að kunna. Yndislegt ár að baki með bæði skemmtilegum uppákomum og neikvæðum en þannig sagði presturinn einmitt að þetta yrði. Hjón verða að standa saman í blíðu og stríðu þar til dauðinn aðskilur. Komandi ár verður ekki síður fullt af uppákomum enda mikið af stórum ákvörðunum framundan og börnin að vaxa úr grasi hraðar en nokkru sinni fyrr. Hjónakornin eiga svo 20 ára samvistar afmæli þann 11 nóvember 2011 sem gerir dagsetninguna ansi skemmtilega 11.11.11 ;)

Frú Ólöf María Gylfadóttir - unglambið mitt ;)

" Ég gæti ekki hugsað mér lífið án þín, saman hefur okkur tekist að framkalla allt það besta fram í fari hvors annars og þroska okkur í þær manneskjur sem við viljum vera og standa fyrir. Við munum áfram standa saman í blíðu og stríðu og komandi tímar munu verða okkur gjöfulir og í alla staði skemmtilegir. Það er mikil tilhlökkun að fá að njóta þess að vera saman það sem eftir lifir og halda áfram þeirri ferð sem við hófum fyrir tæpum 20 árum. Það ferðalag er það allra mikilvægasta í mínu lífi og þakka ég Guði fyrir það að hafa fengið að ferðast með þér. Ég elska þig af öllu hjarta - "út í geim, aftur heim og inn í bein" Haltu áfram að vera þú sjálf og ég vil bara vera Með þér eins og segir í laginu okkar "

Sérðu ekki við fæddumst til að standa hlið við hlið

og halda út á veginn saman og líta aldrei við

Með þér vil ég verða gamall - og ganga lífsins veg

Með þér er lífið ríkara - með þér er ég bara ég

Menn segja að ég sé breyttur, og syngi um börnin og þig

ég syng um það sem skiptir máli, aðeins fyrir mig

Eitt mátt þú vita - ég elska þig, meira en lífið sjálft

ég trúi án þín mitt líf væri, hvorki heilt né hálft

Með þér er vorið yndislegt, og sumarið dýrðin ein

Með þér er haustið göngutúr og ævintýri undir stein

Með þér er veturinn kertaljós, koss og stök rós

Hr. Bjarni Kr

Amma í blokkinni

2011-06-04T06:28:00.007Z

Í vikunni sem leið bárust mér þær fréttir að amma mín, hún Jónína hefði fallið frá. Þegar þessar fréttir bar að stöðvaðist tíminn í augnablik þrátt fyrir að það eina sem er öruggt þegar við fæðumst, er að við munum falla frá einhverntíman á lífsleiðinni. Amma hafði oft talað um dauðann við mig og í raun talaði hún mjög opinskátt um það og þegar ég var að plana eitthvað sagði hún alltaf "ef ég lifi það" eins og hún vildi ekki lofa neinu nema vera alveg viss um að geta staðið við það. Mér hefur alltaf fundist óþægilegt að tala um dauðann en ekki við ömmu, hún kom því bara þannig frá sér að þetta var eðlilegt framhald af dvöl okkar í þessum heimi. Það var mér mikils virði að fá að hafa hana hjá mér þann 5. júní í fyrra þegar við Ólöf María giftum okkur. Amma var ekki viss um að komast þar sem hún hafði verið frekar slöpp en hún kom bæði í kirkjuna og veisluna og fór allt að því síðust heim enda skemmti hún sér konunglega með okkur og við með henni. Að veislunni lokinni kvöddumst við amma eins og við myndum ekki hittast aftur, þar sem ég var að fara erlendis í nám og amma vissi greinilega að við myndum ekki hittast aftur í þessu lífi. Þessi kveðjustund var mín síðasta tenging við ömmu mína hérna megin og mun hún lifa með mér um alla ævi enda var hún bæði innileg og sérstök. Við amma munum þó halda áfram okkar sérstaka sambandi í gegnum æðri máttarvöld.

Amma í blokkinni eins og hún var alltaf kölluð er mér mjög sérstök og hefur átt mikinn þátt í mínu lífi, en hún var viðstödd og tók á móti mér og bauð mig velkominn inn í þenna heim þegar ég fæddist. Við amma töluðumst alltaf reglulega við, og ég gerði mér oft ferð í blokkina til ömmu í kaffi og smá spjall en hún hafði einstakt lag á því að hlusta og ráðleggja án þess þó að leggja dóm á nokkurn hlut sem maður var að fást við. Hún kom sínum skoðunum samt á framfæri og ráðlagði manni án þess að maður tæki eftir því á sama tíma og hún kenndi manni að lifa sáttur við sig og sína. Einstök kona með einstaka hæfileika og samband okkar var að sama skapi einstakt. Ég varð þess aðnjótandi að búa í næstu götu við ömmu og afa á uppvaxtarárunum og svo að búa hjá ömmu um hríð í seinni tíð sem var virkilega góður tími fyrir mig, á annars erfiðum tímamótum í mínu lífi. Amma eins og alltaf dæmdi ekki en ráðlagði og hjálpaði af sinni einstöku snilld. Frá því að börnin mín fæddust var oftar en ekki hjólað í kaffi og kleinu til ömmu á laugardags og sunnudagsmorgnum og muna krakkarnir eftir því að amma gaf þeim alltaf eitthvað gotterí um leið og hún strauk þeim um vangann og sagði eitthvað fallegt við þau. Þrátt fyrir stóran barnahóp kom amma alltaf í barna afmælin og hafði alltaf pakka með og skildi maður stundum ekki hvernig henni tækist að hugsa um allan þennan hóp en eins og allt sem hún tók sér fyrir hendur þá bara einfaldlega gekk það upp. Ég var skírður í höfuðið á Bjarna afa og tengdist ömmu því á sérstakan hátt og er sú tenging sem við amma áttum órjúfanleg. Það er með miklum söknuði í hjarta sem ég kveð ömmu mína án þess þó að vera við jarðarför hennar og mun minning hennar lifa í hjörtum okkar allra um ókomna tíð. Ég veit að amma mín fer á þann besta mögulega stað sem hugsast getur á himnum enda á hún það fyllilega skilið eftir dvöl sína hér og allt það sem hún hefur skilað af sér.

" Elsku Jónína amma, góða ferð til Bjarna afa og njóttu hvíldarinnar í nýjum heimkynnum, á himnum. Það er með miklum trega að ég kveð, en við sjáumst aftur, og þá kem ég til þín í kaffi og kleinu á himnum. Ég mun biðja fyrir þér og til þín eins og þú kenndir mér og minnast allra góðu samverustundanna okkar í gegnum tíðina. Elsku amma, góða ferð "

Bjarni Kristinsson

Tannálfurinn kom í heimsókn

2011-06-03T05:48:00.000Z

Eftir að við fluttum út til DK hefur tannálfurinn verið duglegur að koma í heimsókn en það minnir foreldrana enn og aftur á hversu fljótt litlu krílin vaxa. Þegar Lína Rut kom heim úr skólaferðalaginu fann hún allt í einu að framtönnin var laus og gat hún snúið henni í hring án þess að hún dytti úr. Við þessar tilfæringar datt hún auðvitað úr og fór beint undir koddan það sama kvöld. Í vikunni sem leið missti Ævar Elí líka jaxl og nú raðast inn fullorðinstennur en það er svona orð sem foreldrarnir vilja ekki mikið tala um þ.e. að börnin séu að fullorðnast :) Það er auðvitað réttur gangur lífins að krílin okkar stækki á sama tím og það er erfitt að kveðja litlu börnin okkar sem eru okkur allt. Foreldrarnir taka þessari þróun nú samt fagnandi enda heilbrigð og falleg börn hér á ferð sem stækka og þrekna með hverjum degi. Set hérna mynd af Línu Rut þegar hún kom heim úr skólaferðalaginu bæði þreytt, sólbrennd í kinnum og skítug :)

Kv, Bjarni Kr

Kettlingar fæddir

2011-06-03T05:43:00.000Z

Þrátt fyrir góðan vilja og eftirfylgni að gefa kisunum pilluna tókst eldri kisunni að verða ólétt og er nú búin að fæða 4 kettlinga. Þegar það var ákveðið að setja þær á pilluna voru börnin ekki mjög glöð enda vildu þau fá kettlinga aftur eins og í fyrra en það veitti þeim ómælda ánægju að dröslast með þá um allt og horfa á þá vaxa úr grasi. Þar sem pabbinn lennti í því að slíta á naflastrenginn og gefa þá frá okkur með tilheyrandi óskum um að fá að eiga þá alla vildi hann helst sleppa við það í ár og því varð úr að pillukúr var ákveðinn en þó ekki með meiri árangri en um getur. Krakkarnir eru ferlega ánægðir með árangurinn og eru nú þegar farin að venja litlu krílin við að koma inn til okkar en það er liður í að geta gefið þá að þeir verði ekki villikisur sem búi í útihúsi heldur fái að koma inn og kynnast fólkinu. Set hérna myndir af krílunum en það eru 2 strákar og 2 stelpur. Strákarnir eru gráir og hvítir en stelpurnar þrílitar eins og mamman.

Kv, Bjarni Kr

Skólaferðalag

2011-06-02T05:29:00.000Z

Hér í Danmörku tíðkast að börn fari í skólaferðalög og var þar engin undantekning með börnin okkar í ár. Ævar Elí fór til Kaupmannahafnar með rútu og fékk að skoða Hafmeyjuna, Konungshöllina og söfn og margt fleira og átti góðan dag með skólafélögum sínum og kennurum. Þegar verið var að skoða kórónur og demanta í kjallaranum á konungshöllinni potaði einhver í bekknum í glerið, öryggiskerfið fór í gang og þau urðu að bíða í 30 mínútur eftir að verðir færu yfir aðstæður og athuguðu hvort eitthvað væri horfið - Alltaf skemmtilegar uppákomur þar sem krakkar eru annarsvegar :) Lína Rut fór hinsvegar til Gadbjerg sem er bær hérna rétt hjá þar sem hennar bekkur gisti yfir nótt í sumarbúðum. Hjá henni var ekki síður gaman, útileikir, vasaljósaganga þegar tók að rökkva, grill og margt fleira. Strákarnir í bekknum voru búnir að rífast í 3 vikur um hver fengi að sofa við hliðina á Línu Rut en pabbanum fannst nú vissara að fá kennarann til að setja reglur um að strákar og stelpur myndu sofa sér :) Kennararnir sögðu að Lína Rut hafi verið hálfþreytt á strákunum, en þvílík var ásókn strákanna í stúlkuna að hún gat varla frjáls um höfuð strokið þar til að kennararnir skárust í leikinn og settu smá reglur en þá gat hún farið að leika með stelpunum líka. Vinsælasta stelpan í bekknum bæði hjá strákum og stelpum og henni leiðist það nú ekkert :) Foreldrarnir fengu því aðeins annað barnið sitt heim þessa nótt og var það frekar skrýtið en þetta er ekki síður smá áskorun á foreldrana að átta sig á því að börnin eru að vaxa úr grasi og þurfa smá slaka. Set hérna mynd af grísunum á leið í ferðalagið, alltaf jafn góð hvort við annað.

Kv, Bjarni Kr

Zorro

2011-06-01T05:24:00.000Z

Litli hundastrákurinn okkar er alltaf fljótur að finna sér góða staði til að hvíla sig. Það er sama hvar við erum í húsinu, alltaf er hann með okkur og er ávalt fljótur að koma sér mjög vel fyrir hvar sem er og hvenær sem er :) Hér er mynd af stráknum frammi á verkstæði en hann varð að koma sér vel fyrir á meðan mamma hans var að mála og vinna á verkstæðinu sínu. Pabbinn fann nú kodda til að auka á þægindin fyrir litla manninn sinn :)

Kv, Bjarni Kr

Frú María bakar

2011-05-31T06:21:00.000Z

Frá því við fluttum í sveitina hefur verið mun meira bakað en oft áður þar sem við höfum meiri tíma og ekki síður að þetta er liður í uppeldi og kennslu til barnanna okkar. Á meðan pabbinn var að vinna lokaprófið var frú María að baka með krökkunum og útkoman var bæði glæsileg og gómsæt.

Kv, Bjarni Kr

Gómsætt og fallegt

2011-05-31T06:20:00.001Z

Ekki bara gott heldur líka fallegt :)

Kv, Bjarni Kr

Frú María bakar

2011-05-31T06:14:00.000Z

Ekki amalegt að koma heim í súkkulaðibitakökur að loknum erfiðum degi í skólanum :)

Kv, Bjarni Kr

Lokaverkefnið í höfn

2011-05-31T05:57:00.002Z

Það voru strembnar undanfarnar 3 vikur hér í Grænuhlíð þar sem bóndinn á bænum var að vinna í lokaverkefni fyrir aðra önn. Það var að sama skapi ánægjuleg tilfynning að skila því inn á réttum tíma og vera þar með kominn í frí í 2 vikur en þá tekur við lokapróf sem er munnlegt. Munnlega prófið fer þannig fram að 2 kennarar spyrja út úr lokaverkefninu sem skilað var inn og reyna að hnekkja þeim rannsóknum sem átt hafa sér stað. Þetta er auðvitað smá stressandi en bóndinn er nú nokkuð vanur í þessum bransa og fer ekkert á taugum nema kanski hvað það varðar að markmiðið er sett hátt eftir að hafa fengið hæstu einkun á fyrstu önn dugar ekkert minna á annari önn :) Þetta var hinsvegar hóp-verkefni og því þurfti að koma sjónarhornum allra að í lokin og útkoman verður að ráðast af því. Þann 9 júní kl 13:00 á dönskum tíma verður munnlega prófið sem tekur 30 mínútur og þá er sumarfríið í höfn. Það er tilhlökkun að slaka smá á frá lestri bóka og fara að dunda sér í garðinum svo ekki sé minnst á að taka á móti gestum en það er orðið full bókað hjá okkur bæði í júní og júlí :) Skemmtilegt sumar framundan í sveitinni.

Kv, Bjarni Kr

Skemmtilegur sunnudagur

2011-05-15T17:04:00.004Z

Dagurinn í dag var óvenjulegur hvað það varðar að Lína Rut var ekki heima en henni var boðið í Lególand með bekkjarfélaga sínum af næsta bæ. Klukkan 1 keyrðum við hana því heim til Jeppe og ákváðum að nýta daginn í smá "quality time" með stóra stráknum okkar. Við brunuðum í vatnsleikjagarðinn Lalandia þar sem við sátum í heitupottunum og spjölluðum um lífið og tilveruna og að þessu sinni sagði Ævar Elí að hann hefði ekki mikið að gera enda vantaði litlu dívuna sem stjórnar venjulega ferðinni :) en þess í stað sat hann bara með pabba og mömmu og ræddi málin. Þegar við vorum búin í sundi fékk hann að fara smá í spilasalinn og það fannst honum sko skemmtilegt, hljóp á milli tækja og naut sín í botn. Að því loknu var brunað með hann á McDonalds og hann fékk hamborgara og foreldrarnir nutu þess að ræða um lífið og tilveruna við stóra strákin og þá sérstaklega málefni sem 8 ára stelpur eru ekki tilbúnar að ræða. Það má segja að þetta hafi verið einsskonar inngangur fyrir það sem koma skal en foreldrarnir ræddu í víðum skilningi hinar ýmsu hættur sem ber að varast sem unglingur og að nú færi bráðum í hönd tími þar sem við yrðum að setja nýjar reglur enda nýjar hættur sem myndu fylgja unglingsárunum. Farið var yfir ferminguna og hversvegna við værum að fermast, hvað er Guð og hversvegna trúum við á hann og svo fr. Frábær dagur og fengum við mjög mikið út úr því að vera 3 saman í smá stund en á sama tíma söknuðum við öll litlu dúllunnar. Ævari Elí fannst ofsalega hljóðlátt að keyra á milli staða þar sem enginn væri að syngja né tala og svo vantaði hann að leika við einhvern í sundinu en góður dagur engu að síður og vonandi líka hjá stúlkunni okkar í Legolandi :) Set hérna mynd af stóra stráknum okkar úr fermingaveislu vinar hans á næsta bæ þar sem Ævar Elí mætti að sjálfsögðu með hálstau og í hvítri skyrtu.

Kv, Bjarni Kr

Sumarið komið

2011-05-01T12:19:00.003Z

Í morgun fóru feðginin út og sáðu fyrir nokkrum tegundum í matjurtargarðinn okkar. Það sem varð fyrir valinu varð Maís, Kál, Spínat og Gulrætur. Forsáningin var gerð í tilraunaskyni og verður fróðlegt að sjá hvernig þetta fer hjá okkur. Planið er svo að planta þessu út og selja í sumar hérna á sveitaveginum en það er gamall draumur hjá báðum krökkunum okkar að prófa það. Held að fjölskykldan muni samt borða mikinn hluta af þessu sjálf og nú er bara að vona að allt gangi upp. Við fengum fullt af jarðaberja plöntum í fyrra hjá nágranna konunni okkar og eru þær komnar vel á skrið en hugsanlega var þeim plantað í of miklum skugga en það kemur í ljós í sumar :) Skemmtilegt hobby og allir áhugasamir að taka þátt og nú er bara að vökva og bíða eftir uppskerunni. Set hérna myndir af Línu Rut sem tók þessu mjög alvarlega og vandaði sig mjög mikið við sáninguna og Zorro sem fylgdist vel með öllu þess á milli sem hann gelti á fuglana í trjánum en þeir fara ótrúlega mikið í taugarnar á honum :)

Kv, Bjarni Kr

Ævar Elí 12 ára

2011-04-30T06:37:00.003Z

Í gær varð frumburður okkar Ólafar Maríu 12 ára. Þegar Ævar Elí fæddist var pabbinn orðinn 29 ára og mamman 23 ára og við því virkilega tilbúinn í foreldra hlutverkið sem og við höfum tekið mjög alvarlega. Ævar Elí hefur hinsvegar verið svo yndislegt barn allt frá upphafi að öll uppeldistrikk hafa bara verið ofaní skúffu og er engu líkara en hann ali sig upp sjálfur því fyrir honum hefur aldrei verið haft. Það voru helst fyrstu 3 árin en þá var hann með eindæmum duglegur, lék mikið úti sem inni og var svo fullur af orku að Afi Gylfi kom heim með bók handa okkur um ofvirk börn :) Hinsvegar vissu foreldrarnir alla tíð að litli prinsinn væri einfaldlega að kynna sér aðstæður og það varð úr, þegar orku tímabilinu lauk hefur hann verið eins og ljós. Ævar Elí er eitt blíðasta og besta barn sem við vitum um þó við segjum sjálf frá. Hann má ekkert aumt sjá öðruvísi en að vilja hjálpa og fellir tár við minnsta tilefni, hann er kurteis og mjög hlíðinn á sama tíma og hann er fylginn sér og duglegur. Allt sem hann gerir er með eindæmum yfirvegað og úthugsað, það eru varla neinar tilviljanir í hans lífi og ef hann misstígur sig þá er það bara í eitt skipti því hann lærir hið snarasta af mistökum. Þegar foreldrarnir hafa kennt honum eitthvað þá að sama skapi hefur bara þurft að segja honum það einu sinni og þá er það grópað inn. 12 ára afmælið hans var með öðru sniði þar sem við erum búsett í DK og færri gestir mættu en venjulega. Fullorðins afmæli var þó haldið með hefðbundnum hætti þrátt fyrir að aðeins Amma Inga hafi verið mætt en afmælisveislan varð okkur jafn kær og við fengum tækifæri til að baka marengs og súkkulaði köku og hafa gaman saman :) Barna afmælið varð líka minna þar sem ákveðið var að bjóða ekki bekknum og því komu aðeins vinir af næsta bæ, en engu að síður átti Ævar Elí góðan dag í gær með fjölskyldu og vinum og hló og skemmti sér langt fram á kvöld. Hingað var pöntuð RISA stór pizza og var borðað frá kl 18:00 til kl 22:00 með hléum og drukkið gos.

"Elsku Ævar Elí okkar, Innilega til hamingju með daginn þinn litli pabba strákurinn blíði og mömmu strákurinn góði. Pabbinn og Mamman eru svo glöð að hafa fengið þig inn í líf sitt og þú hefur átt hug okkar allan frá fyrsta degi. Pabbi og Mamma elska þig út í geim og aftur heim :)" Kv, Pabbi og Mamma

Set hérna mynd af litla prinsinum okkar þegar hann var að óska sér á afmælisdaginn :)

Fullorðins afmælið

2011-04-30T06:03:00.003Z

Átti bara þessu einu mynd úr fullorðins afmælinu en þið sem misstuð af marengs kökunni hennar Frú Maríu fáið alla vega að sjá hana á mynd :) Frábær dagur og Ævar Elí opnaði pakkann frá Ömmu Línu sem í var svakalega góður útivistar fatnaður fyrir haustið. Svo fór hann með Ingu Ömmu í H&M og valdi sér sjálfur dress og þegar komið var að gjöfinni frá mömmu og pabba varð úr að hann fengi bara pening enda getum við ekki fundið neitt sem hann vantar eða langar mjög mikið í :) Þegar við spurðum hann rétt fyrir afmælið hvort hann gæti ekki gert óskalista var svarið einlægt að venju "Ég á bara svo góða foreldra sem gefa mér allt og því skortir mig ekkert" Yndislegur drengur sem við eigum :)

Kv, Bjarni Kr

Fullorðins afmæli Línu Rutar

2011-04-30T06:00:00.004Z

Þegar Lína Rut átti afmæli ákvað hún að hefðin um fullorðins afmæli mætti ekki detta út og því ákvað hún strax og hún frétti að Inga Amma væri að koma um páskana að þá skyldi hún halda fullorðins afmælið sitt með Ævari Elí. Þessu var auðvitað fylgt eftir og biðu foreldrarnir því með aðal gjöfina þar til í fullorðins afmælinu. Lína Rut hefur í 1 ár talað um fiðlur og fiðlunám eða allt frá því við giftum okkur en þá heillaðist hún af fiðluleiknum sem var í veislunni. Set hérna link á nánari umfjöllun um það ( Sú Klassíska ) og því varð úr, núna ári seinna, að hún fékk fiðlu. Litla stúlkan okkar vissi ekki hvernig hún ætti að bregðast við gjöfinni og varð hálf kjánaleg en hljóp um og þakkaði okkur endalaust mikið fyrir. Síðan þá er hún búin að ganga um með fiðluna í tösku þess á milli sem hún spilar að eigin sögn lög á hana og lifir sig inní spilverkin eins og henni er von og vísa. Búið er að senda umsókn um tónlistarnám í haust handa skvísunni okkar og verður hún líklega sú fyrsta í ættinni til að fara klassísku leiðina :) Set hérna mynd af litlunni okkar þegar hún fékk gripinn og dreymandi augun leina sér ekki :)

Kv, Bjarni Kr

Inga Amma með grísina sína

2011-04-28T08:15:00.002Z

Inga Amma fann auðvitað enga gjöf frekar en foreldrarnir og var því brugðið á það ráð að fara í H&M og lofa krökkunum bara að velja sér eitthvað. Hér er mynd af þeim hjá Ömmu í sitthvoru sumar dressinu sem Amma gaf þeim enda komið bullandi sumar hjá okkur og stuttbuxna veður hjá okkur alla daga :)

Kv, Bjarni Kr

Prjóna Jóna í stuði

2011-04-28T07:46:00.002Z

Þegar Inga Amma kom til okkar mætti hún með prjónana og lopa meðferðis enda stóð til að prjóna eina dokku á dag og gera peysu á frú Maríu á meðan á dvölinni stæði. Amman sat við öll kvöld og kláraði heila peysu í páskafríinu og hér má sjá afraksturinn. Svakalega falleg peysa sem Inga Amma og Ólöf María hönnuðu saman en frúin var mæld reglulega til að fá peysuna aðsniðna og munstrið og litirnir voru líka hannaðir jafnóðum og er útkoman hin fallegasta peysa. Set hérna mynd af skvísunum í stuði.

Kv, Bjarni Kr

Inga Amma í Danmörku

2011-04-28T07:23:00.001Z

Hér eru nokkrar myndir af Ingu Ömmu við hin ýmsu tækifæri en á meðan hún var hjá okkur var ýmislegt brallað og skoðað. Við fórum með Ömmuna að sjá Hafmeyjuna í Köben, elduðum Íslenskt páskalamb á páskadag, kíktum á kastala í Kolding, kíktum í heimsókn hjá Lilju frænku í Odense, fórum á kaffihús í Odense, skoðuðum fullt af fallegum húsum og kirkjum og svo mætti lengi telja. Set hérna nokkrar myndir af Ömmu í DK - Takk fyrir heimsóknina til okkar og vonandi kemur þú fljótt aftur :)

Kv, Bjarni Kr

Hafmeyjan

2011-04-27T04:58:00.002Z

Við stóðumst ekki mátið að smella einni mynd af okkur við Hafmeyjuna en þrátt fyrir að hafa verið mjög oft í Danmörku undanfarin ár þá létum við aldrei verða að því að skoða litlu styttuna :) Eins og við vissum var styttan nú frekar lítil og umtalið um hana mun meira en raunverulega á rétt á sér en þá er þetta allavega komið af tékk listanum okkar hjóna og myndin komin á netið :)

Kv, Bjarni Kr

Inga Amma á leið heim

2011-04-26T04:42:00.000Z

Páskarnir 2011 í Grænuhlíð voru óvenjulegir hvað það varðar að mamma gamla ákvað að dvelja í sveitasælunni með okkur. Fjölskyldan var því ekki lengur í einangrun frá ættingjum og vinum og nutum við þess að spjalla um heima og geyma um leið og við ferðuðumst þónokkuð um sveitir Jótlands. Lína Rut og Ævar Elí fengu prjónakennslu hjá ömmunni og Frú María fékk fullbúna lopapeysu að lokinni dvölinni enda setti amman sér strax markmið um að prjóna eina dokku á dag og klára peysuna á meðan hún væri hér í orlofi, en nú veit ég hvaðan ég hef þessa endalausu orku og markmiðasetningar-áform um alla hluti :) Að loknum 10 dögum í Grænuhlíð brunuðum við með ömmuna til Köben í flug en nýttum daginn til að skoða Strikið, Nyhavn og Hafmeyjuna. Ömmunni leyst ekki sérlega vel á sig í svona stórborg enda búin að vera í sveitasælu alla páskana en undir dyggri leiðsögn okkar Ólafar gekk þetta allt upp.

Set hérna myndir af krökkunum að kveðja ömmuna en eins og alltaf þá er það erfiðast en það voru allir á einu máli að líklegt sé að amman komi fljótt aftur þar sem dvölin var ljúf í alla staði og við reyndum að dekra hana upp úr skónum, og ein mynd af Frú Maríu í nýju peysunni með ömmunni í Köben :)

Kv, Bjarni Kr

Sláttur hafinn

2011-04-26T04:29:00.001Z

Í gær rauk bóndinn í Grænuhlíð til og sló garðinn enda er byrjað að spretta vel eftir hlýinda kafla undanfarnar vikur. Mikið af moldvörpu holum var í túninu og því gott að fara um á sláttutraktornum og slétta vel áður en meiri spretta gerði vart við sig. Í sól og blíðu settist bóndinn á traktorinn með Ramones í eyrunum og í hvítum bol. 2 tímum seinna kom í ljós að um frekar mikið ryk og drullu var að ræða í túninu og hvíti bolurinn ekki lengur hvítur :) Það var því skömmustulegur strákur sem kom inn enda ekki sjaldan sem ræðan er tekin á börnin að fara ekki út að leika í betri fötunum og allt það :) Set hérna myndir af gamla vel skítugum :)

Kv, Bjarni Kr

Merkileg þróun

2011-04-25T05:05:00.003Z

Það eru miklar tæknibreytingar sem hafa átt sér stað á æviskeiði móður minnar. Allt frá því að búa í Vatnsholti þar sem var mjólkað með höndum í fötu og í það að sitja í Danmörku um páskana og spjalla við Kalla á Skype sem þá var staddur í Grænlandi. Er það nema von að sumt fólk á mömmu aldri eigi erfitt með að aðlagast tækniþróun sem þessari og á þessu ógnarrhraða. Það hefur mamma gamla samt gert enda hefur kreppan eins og hún birtist mömmu og Kalla kanski knúið þau til að verða þáttakendur í tæknivæðingu þar sem Kalli vinnur erlendis en mamma heima á Íslandi. Kalli ef ég man rétt lærði bara á tölvu fyrir nokkrum árum að einhverju marki til þess að geta nýtt þessa tækni verandi erlendis öllum stundum. Merkilegt og á sama tíma nauðsynlegt að fylgja tækniþróun :) Set hérna mynd af mömmu í Danmörku að segja Kalla í Grænlandi að hann sé orðinn afi en það gerðist á meðan mamma var hjá okkur að Sigmar eignaðist litla prinsessu sem við sáum einmitt á Skype aðeins 1 daga gamla.

Kv, Bjarni Kr

Amma að kenna ungviðinu

2011-04-21T17:05:00.003Z

Amman hefur nýtt tímann vel í DK. Hún situr öllum stundum og prjónar handa Frú Maríu og svo er hún að kenna litlu ungunum að prjóna líka. Lína Rut og Ævar Elí eru mjög áhugasöm og stefnan er að reyna að prjóna lítinn bangsa á meðan Amma stoppar. Set hérna mynd af Ömmunni úti í blíðunni við kennslustörf, allir svakalega áhugasamir en Zorro virðist þó hafa meiri áhuga á túninu :)
Kv, Bjarni Kr

Mamma komin í Grænuhlíð

2011-04-21T15:53:00.002Z

Þá er Mamma gamla komin til okkar í Grænuhlíð við mikinn fögnuð viðstaddra. Við höfum tekið því rólega enda veðrið verið þannig að ekki er hægt að ferðast mikið í bílnum og synd að nýta ekki góða veðrið úti í garði. Við höfum þó farið á nokkra staði eins og Lalandia í Billund, Saumabúð í Herning, gjafavöruverslun í Brande, dýragarðinn í Giveskud, bakaríið í Thyregod og svo fórum við í kirkjuna og safnið í Jelling svo eitthvað sé nefnt. Næstu dagar verða svo notaðir í að versla smá í mollinu í Kolding, kíkja í matarboð hjá Lilju frænku í Odense, halda upp á fullorðins afmæli barnanna og fl. Auðvitað höfum við nýtt tækifærið og fengið okkur rauðvínstár á kvöldin og spjallað um heima og geyma, horft á bíómyndir og prjónað en Mamma gamla kom með prónana og er langt komin með að prjóna lopapeysu á Frú Maríu. Skemmtilegt páskafrí hjá okkur þetta árið og gaman að fá Mömmu gömlu í heimsókn. Set hérna mynd af okkur Mömmu að spjalla um bleika tréið fyrir utan bakaríið í Thyregod.
Kv, Bjarni Kr

Ný heimasíða hjá NoMA

2011-04-11T18:20:00.005Z

Nú var verið að uppfæra heimasíðuna hjá skólanum mínum og koma henni í viðeigandi búning þar sem í svona námi er alltaf eitthvað nýtt og þarf síðan að vera í stöðugri uppfærslu. Auðvitað voru allar upplýsingar uppfærðar líka og viti menn, lokaverkefnið mitt frá fyrstu önn var sett inn og er ég bara nokkuð ánægður með það enda eru nokkur hundruð krakkar í skólanum og bara nokkrir valdir til að setja inn verkefnin. Hér má sjá síðuna þar sem bent er á nokkrar síður frá nemendum og þar er kallinn :) http://noma.nu/mainpage4E.asp?Sidenavn=portfolios

Kv, Bjarni Kr

Ævar Elí að flytja verkefni í skólanum

2011-04-11T09:19:00.003Z

Litli prinsinn okkar er búinn að vinna að verkefni í 3 vikur sem hann á að flytja í skólanum í dag. Hann hefur verið að setja saman glærushow eða Powerpoint show í tölvunni um Ísland. Pabbinn reyndi eins og hann gat að hafa ekki áhrif en fór yfir í gær og þetta lítur svakalega vel út hjá stráknum og voru foreldrarnir voða ánægðir með útkomuna. Hann er búinn að finna á google fullt af hlutum um Ísland, setja það upp með texta á hverri síðu, og svo fékk hann Gest frænda og Gunnar Gauta til að senda sér stóran hraunmola úr Eyjafjallajökli sem hann ætlar að sýna um leið og hann opnar "slæduna" um Eyjafjallajökul, svo endar hann á því að fara með ljóð eftir langafa sinn á Íslensku. Hann fór í skólann í morgun með útprentaðar 15 glærur til að hafa með sér upp að töflu, hraunmola í poka og var hinn brattasti með þetta allt saman, og að okkur virtist alveg ófeiminn og óstressaður. Það verður gaman að heyra um gang mála hjá stráknum okkar og heyra söguna þegar hann kemur heim :) Það eru ekki til eins margar nýjar myndir af stráknum okkar en ég set hérna mynd af honum á leið í skólann um daginn í nýju lopapeysunni frá Línu Ömmu.

Kv, Bjarni Kr

Páskarnir að skella á

2011-04-11T09:08:00.003Z

Eins skrýtið og það hljómar þá erum við bráðum búin að vera hér í 1 ár. Okkur finnst tíminn fljúga áfram en allt hefur gengið vonum framar og mun þetta líðandi ár verða okkur minnistætt fyrir margra hluta sakir. Næsta verkefni eru páskarnir og okkur til mikillar ánægju ætlar mamma gamla að vera hjá okkur í 10 daga. Hún ætlar að koma með páskalambið með sér og hér verður því íslenskt lambalæri á páskaborðinu í ár. Frúin á bænum nýtti góða veðrið í gær til að sóla sig en líka í að græja smá páska skraut úti og klippa greinar til að setja inn og gera páskalegt áður en tengdamamma kemur. Veðrið hefur leikið við okkur og um helgina var 20 stiga hiti og glampandi sól þar sem við lékum okkur öll úti, hjónin við tiltekt í garðinum og börnin við leik á trampólíninu og í vatnsúðaranum. Ekki leiðinleg byrjun á páskavikunni þetta veður og vonandi gefur þetta tóninn fyrir komandi vor og sumar. Set hérna smá myndir af skreytingunum hennar Ólafar Maríu.

Kv, Bjarni Kr

Litla prinsessan á leið í skólann

2011-04-11T08:50:00.003Z

Allir morgnar hjá okkur hérna í sveitinni eru skemmtilegir og hver með sinn sjarma. Stundum er erfitt að vekja fólkið og stundum ekki. Stundum eru allir hressir og stundum ekki. En allir morgnar eru okkur foreldrunum gleðilegir og teljum við okkur mjög heppin með hlutskipti okkar og barnanna. Lína Rut er á þeim aldri að hún kemur okkur stöðugt á óvart auk þess sem hún er líka þannig karakter. Ævar Elí er orðinn mjög stöðugur og hefur í raun alltaf verið það, mjög ábyrgur og með mikla réttlætiskennd. Í morgun fannst Línu Rut að augun á henni væri of mikið svona "ný vöknuð" og að hún gæti bara ekki farið í skólann útlítandi. Hún brá á það ráð að fá sér klút og sólgleraugu og fór þannig í skólann sama hvað tautaði og raulaði :) Foreldrarnir leyfa sumt og stoppa annað en það fer auðvitað eftir eðli málsins hverju sinni og var ákveðið að þetta væri alveg í lagi ef hún tæki af sér gleraugun í tíma. Pabbinn brunaði með ungana í skólann en þegar litla konan var að fara út úr bílnum ákvað hún að skilja gleraugun eftir í bílnum og láta klútinn duga. Þetta er mjög einkennandi fyrir uppeldisfræðin en það þarf ekki alltaf að taka allt á hörkunni, sum mál bara leysa sig sjálf, sem og þetta gerði. Eins skemmtilegt og það er að vera 8 ára þá fylgir því auðvitað að vilja kanna mörkin og sjá hvað maður kemst og getur og er það fullkomlega eðlilegt og höfum við lúmskt gaman af því að glíma við ýmis mál af þessu tagi á hverjum degi. Þetta gefur okkur bæði ánægju að vinna í lausnum og sýnir að einstaklingarnir okkar eru fullkomlega eðlilegir og eins misjöfn og raun ber vitni. Set hérna mynd af skvísunni okkar sem var eins og "Rokkstjarna" á leið í skólann :)

Kv, Bjarni Kr

Foreldra fundur hjá Línu Rut

2011-03-29T18:28:00.003Z

Í dag kl 17:10 var svo foreldra fundur með kennurunum hennar Línu Rutar. Farið var yfir helstu atriði eins og venjan er og eiga kennararnir varla orð yfir hversu góða stúlku við eigum. Lína Rut er vinsælasta stúlkan bæði hjá strákum og stelpum og á hún ekki í nokkrum vandræðum með að eignast vini né að finna sér eitthvað að gera í frímínútum. Lína Rut fékk 12 í lestri en lestrargetan samsvarar þeim sem eru að byrja í 3ja bekk ( 4 bekkur á Íslandi ) Lína Rut á hug og hjörtu kennarana og var aðeins 1 atriði sem við vorum beðin að vinna í frekar og það er að hún á það til að vilja ekki taka þátt þegar þarf að lesa upphátt og fara uppá töflu og reikna. Með öðrum orðum smávægileg vandamál ef vandamál skyldi kalla en engu að síður munum við vinna í því að bæta skvísuna okkar á þessum sviðum. Þetta svipar aðeins til Ævars Elí á hans fyrstu árum í skólanum að hann vildi ekki taka þátt nema að hann væri 100% viss um að gera það fullkomlega vel og því átti hann þetta til líka en búið er að þjálfa það af honum og verður það gert líka við dótturina. Sem sagt skólaskoðun í morgun þar sem allt var 100% og foreldra fundur í dag þar sem allt var 100% líka. Frábærir krakkar sem við eigum og var haft á orði að við mættum ekki flytja aftur heim því þau ættu svo erfitt með að sjá á eftir krökkunum :) Set hérna til gamans mynd af litli skvísunni okkar frá í vetur.

Kv, Bjarni Kr

Skólaskoðun

2011-03-29T11:01:00.003Z

Í morgun var farið með litlu skvísuna í skólaskoðun öðru sinni hér í DK. Í ljós kom að Lína Rut hefur stækkað um 4 cm á 5 mánuðum og þyngst um 3,5 kíló svo það er ekki skrýtið að þessi litla elska sé stundum að kvarta yfir vaxtaverkjum. Hún mældist með 100% heyrn, 100% sjón og er skráð sem fullkomin og glöð stúlka á pappírunum hjá hjúkrunarfræðingnum. Lína Rut fékk miða með spurningum sem hún átti að svara á dönsku og svo átti að teikna mynd af fjölskyldunni. Hún teiknaði flotta mynd og litaði með trélitum og þegar betur er að gáð er mamman að kyssa pabbann :) Foreldrarnir svakalega ánægðir með litla demantinn sinn sem er 100% í einu og öllu. Set hérna mynd af teikningunni hennar :)

Kv, Bjarni Kr

Ævintýraferðin

2011-03-29T10:50:00.005Z

Í gær fóru feðginin í ævintýraferð hérna í sveitinni. Við sáum um daginn að á maís-korna-akrinum glitraði á fullt af steinum og eftir kvöldmatinn í gær var ákveðið að fara í leiðangur með vasaljós og kanna hvort ekki fyndust fallegir steinar. Við tókum með lítinn bala og svo var arkað út á akurinn og viti menn, fullt af steinum komu með heim, allskonar glitrandi og mislitir. Línu Rut fannst samt að það þyrfti að þrífa þá alla svo þeir yrðu enn flottari og var því gripið á það ráð að þrífa alla steinana í vaskinum og þurrka þá og velja svo úr þá flottustu. Skemmtileg kvöldstund og Lína Rut fór alveg á kostum þegar ljótir steinar komu upp úr balanum og sagði alltaf "Pabbi ? Fannst þú þennan ? " Zorro litli fylgdist vel með öllu sem var að gerast í vaskahúsinu og var svo forvitinn að hann varða að vera uppi á borði til að fylgjast náið með og Lína Rut spurði hann alltaf álits hvort hún ætti að henda eða hirða steinana :) Zorro var þó pínu vandræðalegur með þetta þar sem hann veit að hann má ekki vera uppi á borði en hér á bæ eru gerðar þær undantekningar sem þarf svo að allir geti tekið þátt :) Set hérna nokkrar myndir af þrifunum í vaskahúsinu :)

Kv, Bjarni Kr

Tíminn flýgur áfram

2011-03-20T09:02:00.005Z

Af sveitafólkinu er það helst að frétta að okkur finnst tíminn fljúga frá okkur en samkvæmt fræðunum þýðir það að það sé gaman hjá okkur :) Hér gengur allt sinn vana gang þar sem hver sinnir sínu verkefni af kostgæfni og má segja að öllum gangi vel, hver á sínu sviði. Ég stunda skólann í Kolding af miklum áhuga og læri stöðugt eitthvað nýtt þó inná milli komi reynslan sér vel og þá er það sérstaklega í tímum sem fjalla um viðskipti og samskipti við fyrirtæki. Þar hafa krakkarnir í bekknum mínum enga reynslu en ég hef prófað það allt af eigin raun sem kennarinn talar um. En að sama skapi eru þau mér fremri á öðrum sviðum og skiptumst við á að hjálpa hvert öðru í bekknum og er kennslan að mikli leiti byggð upp á því að við hjálpumst að. Lína Rut og Ævar Elí stunda sitt nám af miklum dugnaði og hafa þáu stöðugt komið okkur á óvart með frammistöðu sinni á erlendri grund. Kennararnir eru virkilega ánægðir með þau og eins og Einar afi minn sagði þegar hann fór heim úr kirkju á sunnudögum "Börnin mín bera alveg af" :) Frú María sér um að við þrífumst og klæðumst og að allir fari með réttar bækur í töskunni, að allir fari á réttum tíma í háttinn, tannbursti sig og svo framvegis, án hennar væri þessi dvöl okkar hér í útlandi ekki gerleg. Frúin hefur ekki verið alveg við hesta heilsu en frá áramótum þegar öll áramótaheitin voru sett höfum við bætt við okkur heilsutengdu fæði, bætt við hreifingu og ýmsu fleiru til að reyna að fá alla þessa kroppa til að starfa rétt. Hlaupahringirnir í sveitinni gera okkur mjög gott svo og spínatið, avókadóið, græna teið og margt fleirra sem við erum að gera og nú er bara að óska þess að allir haldi heilsunni sinni sem er það mikilvægasta í lífinu. Þar sem nú vorar hratt og útiveran því meiri með hverjum deginum er hér einn lítill ferfætlingur sem algerlega elskar að við séum að fara út á tún að hlaupa. Þegar fólkið á bænum tekur fram annað hvort hlaupa skóna, I-podinn eða húfu og vettlinga þá gjörsamlega hoppar hann og grætur af gleði við útidýrnar. Hér eru sem sagt allir að gera eitthvað við sitt hæfi og það eru klárlega allir að njóta sveitasælunnar í botn á meðan við búum hér :) Set hérna myndir af Línu Rut og Zorro en hann er búinn að fatta hvar er best að stilla sér upp á meðan heimilisfólkið er að borða því það leggst mest til að aukabitum og mylsnu af disknum hennar Línu Rutar. Hún notar líka alltaf tækifærið og kennir honum hlíðni og lætur hann bíða eftir hverjum bita þar til hún segir "Gjörðu svo vel Zorro" og lætur hann sig hafa alla þessa kennslu fyrir einn vænan kjötbita :)

Kveðja Bjarni Kr

Nýtt áhugamál

2011-03-15T08:36:00.003Z

Þar sem undirritaður hefur óstjórnlega gaman af því að skrifa, hvort heldur er á þessa bloggsíðu fjölskyldunnar, facebook eða aðra miðla hefur bæst við smá áhugi á því að blogga fyrir umheiminn. Fyrir 2 árum kviknaði þessi hugmynd en of mikið var að gerast í lífinu okkar til að hægt væri að einbeita sér að skrifum, nú hinsvegar eru rólegri tímar inn á milli hjá okkur og því gefst tími til að sinna hugðarefnum af þessu tagi. Ég er byrjaður að skrifa barnabækur og þeir sem þekkja mig fatta strax að orðið er í fleirtölu :) Ég er með 10 bækur í vinnslu, allar stuttar reynslusögur barna með jákvæðan boðskap og fallegan endi. Sem sagt uppbyggjandi um leið og skemmtun fyrir börnin. Þessi flokkur "Reynslu sögur" verður sá fyrsti af vonandi mörgum bókaflokkum en til að byrja með einbeiti ég mér að fyrstu bókinni. Hún ber auðvitað titilinn "Saga úr sveitinni". Jean ætlar að hjálpa mér að myndskreyta fyrstu bókina mína og svo sjáum við til hvernig framhaldið verður. Sem sagt smá gæluverkefni með náminu. Að auki hef ég endurvakið bloggið mitt á mbl en þar stendur til að tjá sig meira á opnum vetvangi fyrir alþjóð og má skoða það hér á þessari slóð: http://bjarnikr.blog.is

Sem sagt, þegar gefst stund þá dundar maður sér við ýmislegt :)

Kv, Bjarni Kr

Krókusarnir mættir

2011-03-15T08:17:00.005Z

Það lifnar yfir sveitinni okkar með hverjum deginum sem líður. Brum sjást orðið á hverju einasta tré, kisurnar koma seint heim á kvöldin, fuglasöngurinn að aukast í trjánum svo ekki sé minnst á litlu krókusana sem eru hér um allan garð. Lína Rut og Frú María skruppu út í gær í smá leiðangur að skoða og mynda krókusana. Í vorblíðunni má finna angan víðsvegar af og greinilegt að vorið er komið til okkar. Lína Rut er eins og við sem þekkjum hana vita alltaf svo ánægð með lífið og tilveruna og þegar vorið kemur verður hún dreymandi og fer í hugarflug um tún og engi og það átti líka við í ferð þeirra mæðgna í garðinum í gær. Lína Rut vildi auðvitað fá mynd af sér að lykta af ilmandi krókus og má sjá dreymandi svip á andliti litlu dúllunnar okkar sem elskar svo lífið og tilveruna. Set hérna myndir af Línu Rut og krókusunum frá í gær :)

Kv, Bjarni Kr

Vorið er komið og grundirnar gróa

2011-03-14T08:08:00.006Z

Nú hlýnar með hverjum deginum sem líður hjá okkur og núna er úti hitastigið 10 gráður og stilla. Krókusarnir farnir að kíkja upp úr grasinu og túlípanar sjást hér og þar. Sumarið í fyrra er okkur öllum minnistætt enda var sólbaðsveður alla daga og við í nýju og framandi landi. Núna hinsvegar erum við búin að hlaupa af okkur hornin sem nýbúar og það verður gaman að taka komandi sumri fagnandi í sveitinni og skoða aftur það sem var markverðast í fyrra og meira til. Dýragarðurinn í Giveskud er alveg yndislegur og fórum við ef ég man rétt 3 ferðir þangað í fyrra og munum við örugglega fara þangað aftur í ár. Þar er hægt að keyra um á bílnum, innan um ljón, gíraffa og Buffaló ásamt því að ganga um allt og skoða. Ekki skemmir trampolín veröldin á leiksvæðinu fyrir börnin, en það eru líklega 30 mismunandi týpur af trampólínum til að leika sér á og prufa ásamt öðrum leiktækjum. Spennandi sumar framundan og set ég hérna nokkrar myndir úr garðinum frá í fyrra svona fyrir þá sem ætla að heimsækja okkur í sumar :)

Kv, Bjarni Kr

Skvísupartý

2011-03-13T14:47:00.000Z

Það var nú ekki leiðinlegt í Grænuhlíð í gær þegar hér voru saman komnar 7 skvísur úr bekknum hennar Línu Rutar. Það var stöðugt hlegið og haft gaman :) Þetta var skemmtileg blanda af stelpum og voru sumar mjög frakkar og aðrar feimnar en allt gekk upp og tungumála örðugleikar trufluðu ekki fjörið. Að loknu kökuátinu og gosþambinu var farið inn í vinnustofu þar sem var perlað, teiknað, sungið og leikið og þurftu foreldrarnir ekki að líta á hópinn fyrr en 4 tímum seinna þegar þær voru sóttar, svo stilltar og góðar stelpur voru þetta upp til hópa. Síðasta mamman sem kom smellti sér meira segja í smá heimsókn og talaði stöðugt í 1 klukkutíma og var mikið hlegið. Af okkar mati er hún alger perla en hún segist ekki vera hefðbundin Dani, enda er hún ekta bóndakona, stór og mikil með hátt stemda rödd og fór mikinn, en við höfðum ótrúlega gaman af henni og nutum þess að hlusta á grínið og sögurnar sem hún sagði okkur. Set hérna nokkrar myndir af fjörinu :)

Kveðja Bjarni Kr

Allt að verða klárt

2011-03-13T13:56:00.004Z

Lína Rut okkar tók virkan þátt í að gera klárt fyrir skvísupartýið sem hún hélt fyrir bekkjasystur sínar. Þar sem litla stúbban okkar er að stækka og þroskast varð Hanna Montana þema fyrir valinu í stað Barbie áður :) Hún raðaði og græjaði allt á meðan mamman bakaði súkkulaðiköku, Rice Crispy kökur og fleirra góðgæti. Þar sem foreldrarnir voru ekki klárir á Danska afmælis söngnum og stelpurnar svo feimnar þá varð að bregða á það ráð að syngja bara á Íslensku og leiddur foreldrarnir sönginn. Allt fór vel og allir skemmtu sér og höfðu gaman. Zorro litli var hinsvegar mest hrifinn af súkkulaði lyktinni sem var í loftinu og reyndi ólmur að næla sér í kökusneið :)

Kveðja Bjarni Kr

Hún á afmæli í dag

2011-03-07T08:26:00.005Z

Í dag er litla heimasætan 8 ára gömul þrátt fyrir að foreldrunum finnist hún hafa fæðst í gær. Þessi litli sólargeisli kom í heiminn með fullmótaða vitund fyrir sjálfri sér og framtíðar áformum. Það var alveg ljóst strax að hún vissi hvað hún vildi og ekki var hægt að nota á hana uppeldistrikk eins og "hvort viltu fara í rauðu eða bleiku stígvélin" á meðan flest börn velja annað hvort svaraði hún um hæl "ég ætla í strigaskóm" svona bara var hún frá fyrsta degi og er enn í dag, en aldrei með frekju eða yfirgangi heldur yfirveguðum tón þar sem greinilega kemur í ljós hver ræður ferðinni :) Þetta litla gull hefur fyllt líf okkar og ykkar allra sem hana þekkið með mikilli lífsgleði en það hefur einkennt hana mikill drifkraftur og gleði þrátt fyrir að vera ekki líkamlega mikill bógur. Hún stendur ávalt föst á sínu um leið og hún finnur mikið til með þeim sem minna mega sín, réttlætiskennd foreldranna skín þar í gegn og er það vel, enda hefur réttlæti og sanngirni verið stór þáttur í uppeldinu.

Listir er eitthvað sem Lína Rut einfaldlega hefur og ef hún hefur það ekki segir hún bara öllum að þetta sé ekkert mál, en hún hefur mikið dálæti á öllum listum, teikningum, hönnun, söng, leik og svo mætti lengi telja svo ekki sé minnst á nýjustu listina sem hún hneigist til "Klassísk tónlist" Það hefur komið okkur mest á óvart því fáir í fjölskyldunni eru að hlusta á svoleiðis tónlist en Lína Rut situr tímunum saman og velur fiðlutónlist á youtube sem hún spilar aftur og aftur og vill endilega deila með okkur hinum. Ég skrifaði smá pistil um Línu Rut hér neðar á síðunni þar sem við lentum í basli með hana í antíkbúð, þegar hún sá fiðlu í búðinni og var nánast ekki hægt að ná skvísunni út, svo mikill var áhuginn fyrir þessu og nú hafa foreldrarnir áttað sig á því að þetta er meira en stundargaman því litla skinnið hlustar á þetta öllum stundum og talar ítrekað um fiðlur. Nú er svo komið að búið er að panta fiðlu frá Íslandi og stefnt er á að fá hana til DK með Ingu ömmu þegar hún kemur til okkar. Búið er að panta ódýra byrjenda fiðlu og verið er að leita að tónlistarskóla í þessum töluðu orðum. Lína Rut veit þó ekki af þessu og mun það koma henni verulega á óvart í fullorðins afmælinu þann 29 apríl.

Eins og þeir sem þekkja okkur vita, voru alltaf haldin barnaafmæli í Tröllhólum og svo sér fullorðins afmæli og Lína Rut var fljót að skipuleggja þetta þegar hún frétti að Inga amma væri að koma. "Sko Pabbi...við höldum bara barnaafmæli í mars og svo fullorðins afmælið þegar amma kemur og þá getum við Ævar Elí haldið saman fullorðins afmæli" Þar sem núverandi staðsetning gerir ekki ráð fyrir fullorðins afmæli var þetta flott lausn og litla skvísan alveg til í að bíða bara eftir Ingu ömmu frekar en að sleppa fullorðins afmælinu sínu :)

Í dag var litla stúbban okkar vakin með afmælissöng og fékk að fara með sleikjó í skólann til að gefa bekkjarsystkynum sínum en einnig fékk hún að opna pakka frá Maríu Katrínu, Gesti, Gunnari og Hákoni ásamt litlum pakka frá pabba og mömmu og stórum pakka frá Línu ömmu.

Frá nauthólafjölskyldunni fékk skvísan "tísku hönnunar sett" þar sem hún á að teikna sjálf og hanna föt og helst vildu hún fara með það í skólann en samkomulag var gert um að hún fengi að byrja strax að teikna þegar hún kæmi heim. Það var líka glöð og ánægð stelpa sem fór í skólann í morgun í lopapeysu frá Línu ömmu og með bókina sína frá foreldrum sínum en bókin er um Ballerínu prinsessuna Línu Rut :)

Set hérna mynd af skvísunni á leið í skólann í morgun :)

Kv, Bjarni Kr

Afmælisdagurinn var tekinn snemma

2011-03-07T08:00:00.002Z

Það fyrsta sem litla dúllan spurði um þegar hún vaknaði var að fá að opna pakkana sem höfðu borist í póstinum. Foreldrarnir gátu á engan hátt látið litluna sína bíða þar til eftir skóla og því var brugðið á það ráð að opna bara pakkana áður en morgunmaturinn var framreiddur. Hún opnaði fyrst pakkann frá Ömmu Línu og var fljót að hoppa í lopapeysuna sem smellpassaði og fór skvísunnu svakalega vel. Því næst var það "Stóri" pakkinn eins og Lína rut kallaði pakkann frá Maríu Katrínu og Co. Upp úr honum kom ekta skvísudót sem búið er að leika með á fullu enda tíska og hönnun ofarlega á áhugasviðs listanum um þessar mundir hjá þessari 8 ára skvísu sem við eigum orðið. Set hér myndir af Línu Rut að opna pakkann með stírurnar í augunum og svo aðra mynd þegar vinkonan kom um kvöldið að leika með dótið - Takk allir fyrir gjafirnar handa stúbbunni okkar :)

Kv, Bjarni Kr

Afmælisprinsessa

2011-03-06T19:07:00.004Z

Í dag mættu góðir gestir frá Odense í smá afmæliskaffi í tilefni afmæli Línu Rutar sem er á morgun 7 mars. Sandra, Oddur, Jóhanna og Hugi komu keyrandi í sveitasæluna í glampandi sólskyni og blíðu. Það má með sanni segja að nú sé litla stelpan okkar að taka stórt skref enda hafa foreldrarnir séð stórt þroska stökk í vetur. Á morgun eigum við orðið 8 ára stelpuskott sem hefur fyllt líf allra sem hana þekkja með söng, leik, hlátri og endalausri gleði og fegurð. Set hérna mynd af litlu skvísunni okkar frá í dag sem kom rjóð í kinnum og með rautt nef að afmælisborðinu eftir að hafa nýtt vorsólina í dag til að leika úti á trampólíni.

Kveðja Bjarni Kr

Draumastólarnir

2011-03-06T18:21:00.008Z

Þegar við giftum okkur í fyrra þann 5. júní 2010 fengum við pening frá mjög mörgum enda erfitt að finna gjöf handa pari sem hefur verið saman í næstum 20 ár og væri þar að auki að flytja úr landi þremur dögum eftir brúðkaup. Við létum loksins verða að því að fjárfesta í brúðargjöf eins og til stóð og úr varð kaup á "draumastólunum" í eldhúsið. Um leið og við þökkum enn og aftur fyrir gjafirnar sem við fengum, fyrir frábæran brúðkaupsdag sem verður okkur ógleymanlegur og óendanlegan hlýhug í okkar garð set ég hérna mynd af stólunum sem voru vígðir í dag. Frú María naut sín alveg í botn þegar hún dekkaði upp fyrir afmæliskaffi einkadótturinnar hérna í sveitinni.

Kærar kveðjur og þökk frá okkur Ólöfu Maríu til allra þeirra sem tóku þátt í þessum yndislega degi 5. júní 2010

Öskudagsfjör

2011-03-05T07:32:00.005Z

Í vikunni hélt foreldrafélagið í bekknum hennar Línu Rutar smá öskudagsskemmtun. Það var pöntuð pizza handa börnunum og stórar samlokur handa fullorðnum. Allir skráðu mætingu nema ein stelpan í bekknum komst ekki þar sem mamma hennar var treysti sér ekki þar sem hún hafði nýlega misst fóstur en Lína Rut rétti upp hönd í bekknum og sagðist vilja lofa henni að koma heim með sér eftir skóla, koma með okkur á skemmtunina og svo myndu pabbi og mamma bara skutla henni heim. Þetta var fallega gert hjá einkadóttur okkar og auðvitað tókum við þetta verkefni að okkur og þurfti Ólöf María því að græja tvær stelpur fyrir grímuballið en það fór allt vel og var spenningurinn mikill. Allir mættu með sína eigin drykki og svo var setið og spjallað í nokkra tíma. Við mættum auðvitað með kaffi á brúsa, kók og snakk fyrir krakkana en þegar við fórum að tína upp á borðið sáum við aða flestir voru með hvítvín og bjór. Þetta er eitthvað sem maður þarf að venjast hérna í DK en það er ekkert tiltökumál að drekka í barnaskólum landsins. Okkur finnst þetta auðvitað skrýtið enda eigum við þessu ekki að venjast en það eru engin drykkjulæti heldur er þetta mjög yfirvegað. Þegar búið var að borða var svo kötturinn sleginn úr tunnunni og þá var heldur betur fjör hjá krökkunum. Þetta var sem sagt skemmtileg kvöldstund með krökkunum og við kynnumst alltaf foreldrum betur í hvert skipti sem við mætum á svona mannamót.

Set hérna nokkrar myndir af fjörinu :)

Kveðja Bjarni Kr.

Stelpurnar klárar

2011-03-05T06:55:00.000Z

Hér eru myndir af Ólöfu Maríu með skvísunum þegar búið var að mála þær, krulla hár, naglalakka og líma glimmersteina í andlitið. Þetta átti nú heldur betur við skvísuna okkar sem fílaði sig eins og Alicia Keys og mömmu leiddist þetta ekkert sérstaklega mikið heldur og tók þátt í fjörinu með litlu dúllunum. Georgiana hafði aldrei hitt svona hressa mömmu og hafði mjög gaman af sprellinu og undirbúningnum.

Kv, Bjarni Kr

Lína Rut fyrirsæta

2011-03-05T06:54:00.000Z

Litla skvísan okkar alveg að fíla sig sem Alicia Keys :)

Kv, Bjarni Kr